लक्ष्मीपुर पतारी, सिरहा । नेपाली कांग्रेसका सिरहा जिल्ला सभापति रामचन्द्र यादवले नेकपा एमालेले विकासको काम देखेर अत्तालिएर गलत प्रचारमा उत्रिएको आरोप लगाउनुभएको छ । आज लक्ष्मीपुर पतारीमा आयोजित कार्यकर्ता भेलालाई सम्बोधन गर्दै सभापति यादवले यस्तो बताउनुभएको हो ।
उहाँले भन्नुभयो, “लक्ष्मीपुर पतारी गाउँपालिकामा नेपाली कांग्रेसको नेतृत्वमा भएको अभूतपूर्व विकास निर्माणको काम देखेर प्रतिपक्षी एमाले अत्तालिएको छ । उनीहरुलाई २०८४ को चुनाव हार्ने निश्चित भएपछि जनतामा भ्रम छर्ने र गलत प्रचार गर्ने काम सुरु गरेका छन् ।”
सभापति यादवले एमालेका नेताहरूलाई रचनात्मक प्रतिपक्षको भूमिका खेल्न र विकासको काममा बाधा नपुऱ्याउन आग्रह गर्नुभयो । उहाँले थप्नुभयो, “हामी विकासको राजनीति गर्छौं, विनाशको होइन । एमालेले फैलाएको भ्रममा नपर्न म सम्पूर्ण गाउँपालिकावासीलाई अपिल गर्दछु । तपाईंहरुको मतले बनेको स्थानीय सरकारले तीव्र गतिमा काम गरिरहेको छ ।”
भेलामा बोल्दै उहाँले गाउँपालिका अध्यक्ष चतुरानन्द ठाकुर र उपाध्यक्ष अमरकला यादवको नेतृत्वमा कृषि, स्वास्थ्य, शिक्षा र पूर्वाधारका क्षेत्रमा उल्लेखनीय काम भएको र बाँकी रहेका कामहरू पनि यही कार्यकालमा सम्पन्न गर्ने प्रतिबद्धता व्यक्त गर्नुभयो । उहाँले भन्नुभयो, “टोल–टोलमा विकास पुगेको छ, जनताले प्रत्यक्ष लाभ महसुस गरेका छन् । यो विकासको लहर देखेर नै एमालेका साथीहरू निराधार आरोप लगाउँदै हिँडेका छन् ।”
सभापति यादवले पार्टीका सबै कार्यकर्ताहरूलाई एकजुट भई स्थानीय सरकारले गरेका राम्रा कामको प्रचार गर्न र एमालेको गलत प्रचारलाई चिर्दै अघि बढ्न निर्देशन दिनुभयो ।
