लहान । सिरहाका प्रहरी प्रमुख एसपी अनन्त राम शर्मा , डीएसपी विरेन्द्र पासवान र ईलाका प्रहरी कार्यालय लहानका प्रमुख प्रहरी नायब उपरीक्षक हिरेन्द्र रोकायाले लागू औषध विरुद्ध कठोर कदम उठाएको छ । सिरहा प्रहरी प्रमुखको रुपमा जिम्मेवारी सम्हालेसँगै शर्मा , जिल्ला प्रहरी कार्यालय सिरहाका सूचना अधिकारी पासवान र ईलाका प्रहरी कार्यालय लहानका प्रमुख हिरेन्द्र रोकायाले लागुऔषध विरुद्ध कठोर कदम चालेको हो ।

लागुऔषध ओसार र प्रयोगकर्ताहरुलाई नियन्त्रण गर्न जिल्ला प्रहरी कार्यालय सिरहाले तीन महिने अभियान नै संचालन गरेका छन् । अभियानसँगै छोटो समयमा प्रहरीले ठूलो सफलता हात परेको छ । प्रहरीले लागुऔषधका कुनैपनि घटना पक्राउ परेकाहरुलाई सार्वजनिक गर्ने कानुन बमोजिम कारबाही अघि बढाउने गरेका छन् ।

अभियान अन्तर्गत प्रहरीले पछिलो पटक ३३ ग्राम ब्राउन सुगर सहित तीन जना पक्राउ परेका छन् । जिल्ला प्रहरी कार्यालय सिरहा र इलाका प्रहरी कार्यालय लहानको सन्युक्त टोलीले बिगतमा पनि लागुऔषधको कारोबार गरेका तीन जनालाई पक्राउ गरेको हो ।

पक्राउ पर्नेमा सिरहाकै धनगढीमाई नगरपालिका – ९ का २२ वर्षका पवनकुमार साह, २३ वर्षका अंकेश कुमार महतो र २० वर्षका लालबाबु राय रहेका छन् । उनीहरु तीनैजनाको साथबाट ब्राउन सुगर बरामद गरेको जिल्ला प्रहरी कार्यालय सिरहा सूचना अधिकारी विरेन्द्र कुनार पासवानले जानकारी दिए । पवनको साथबाट तराजु, अंकेशको साथबाट १५ ग्राम र लालबाबुको साथबाट ३१ ग्राम ब्राउन सुगर बरामद गरेको छ ।

उनिहरु बिरुद्ध लागुऔषध मुद्दामा अदालतलबाट १० दिनको म्याद लिएर अनुसन्धान भइरहेको सूचना अधिकारी पासवानले जानकारी दिए ।

उनीहरु तीनैजना यसअघि २०८१ साउन १३ गते पनि लागुऔषध खैरोहिरोइनसहित पक्राउ परेर अदालतबाट मंसिर २० गते ४ महिना कैदको फैसला भएको थियो । उक्त फैसलापछि पनि उनीहरु भने लागुऔषधकै कारोबारमा रहेको खुलेको छ ।

त्यसैगरि : प्रहरी चौकी खिरौना र लागुऔषध नियन्त्रण ब्युरो शाखा कार्यालय गोलबजारबाट खटिएको संयुक्त विशेष प्रहरी टोलीले गोप्य सूचनाको आधारमा २२ र २३ चैतमा गरेको चेकजाँचको क्रममा छुट्टाछुट्टै ठाउँबाट ब्राउनसुगरसहित आठजनालाई पक्राउ गरेको हो। सोमबार सिराहा जिल्ला अदालतबाट म्याद लिएर थप अनुसन्धान भइरहेको जिल्ला प्रहरी कार्यालय सिराहाले जनाएको छ।

छिमेकी मुलुक भारतको सीमावर्ती बजार जयनगरबाट बा. प्र. ०२–०३२ प ५१३१ नम्बरको पल्सर मोटरसाइकल चढेर आउँदै गरेका सिन्धुलीको दुधौली नगरपालिका– १० का करिब २४ वर्षीय प्रवीण बुढाथोकी र करिब २२ वर्षीय श्रवण कुमाललाई चेकजाँच गर्दा प्लास्टिकबाहेक दुई ग्राम पाँच सय मिलिग्राम ब्राउनसुगर बरामद भएको सिराहा प्रहरीका सूचना अधिकारी प्रहरी नायब उपरीक्षक वीरेन्द्रकुमार पासवानले जानकारी दिए।

पासवानका अनुसार जयनगरबाट म.प्र. ०१–००५ प २०३१ नम्बरको मोटरसाइकलमा सिराहातर्फ आउँदै गरेका मिर्चैया नगरपालिका– ८ का करिब १९ वर्षीय सुशान्त पञ्जियार र मिर्चैया– ५ का करिब २० वर्षीय विजय महतोलाई पनि चेकजाँच गर्दा प्लास्टिकसहित ०.९२ ग्राम खैरो हेरोइन बरामद भएको छ।

त्यस्तै, माडर–लहान रुटको यात्रुवाहक बसमा चेकजाँच गर्ने क्रममा काठमाडाैं महानगरपालिका– ११ बस्ने करिब २१ वर्षीय सुनीलबहादुर तामाङको साथबाट प्लास्टिकसहित २३.९५ ग्राम खैरो हेरोइन बरामद भएको प्रहरीले जनाएको छ। प्रहरीका अनुसार उनीहरू पाँचजनाविरुद्ध अदालतबाट पाँच दिनको म्याद लिएर जिल्ला प्रहरीमा राखेर थप अनुसन्धान भइरहेको छ।