सिरहा । सिरहाको औरही गाउँपालिका अध्यक्ष शिवजी यादव र पूर्ववडाध्यक्ष दिलीप यादवलाई झुठा मुद्दामा फसाउन खोजिएको भन्दै जनता समाजवादी पार्टी नेपाल सिरहाले जिल्ला प्रशासनमा ज्ञापन पत्र बुझाउदै अविलम्ब रिहा गर्न मांग रहेको छ ।
जसपा नेपाल सिरहाका अध्यक्ष अशोक यादवले प्रमुख जिल्ला अधिकारीलाई ज्ञापनपत्र बुझाउँदै अविलम्ब रिहा नगरिए आन्दोलनको चेतावनी दिएका हुन् । उनले छलफलका लागि बोलाएर मानमर्दन हुनेगरी अध्यक्ष यादवसहितलाई थुनामा राखेकोमा आपत्ति जनाउँदै विनासर्त ससम्मान रिहा गर्न माग गरेका छन् ।
उनले राजनीतिक प्रतिशोधका कारण कपोलकल्पित रुपमा छुवाछूतको मुद्दा लगाई प्रताडित गरी थुनामा राखेको र झूटा आरोप लगाई जाहेरी दर्ता गर्ने काम भएको पनि ज्ञापनपत्रमा उल्लेख गरेका छन् ।
गाउँपालिका अध्यक्षलगायत सम्पूर्ण गिरफ्तार गरिएका व्यक्तिहरुलाई अविलम्ब ससम्मान थुना मुक्त नगरिए आन्दोलन गर्न बाध्य हुने र त्यसबाट उत्पन्न हुने विषम परिस्थिति र क्षतिको जिम्मेवारी प्रशासनले लिनुपर्ने चेतावनी जसपा नेपालले दिएको छ ।
कृषि बजार निर्माणको लागि स्थानान्तरण गरिएको दिपक मल्लिकको घरको विषयलाई अतिरंजीत गर्दै गापा अध्यक्ष, पूर्ववडाध्यक्ष यादव र बजरंगी बाबा विरुद्ध छुवाछुतको झुठामुद्दा लगाउदै पक्राउ गरेको छ ।
