काठमाडौं । पुल निर्माणमा भ्रष्टाचार गरेको अभियोग लागेका गाउँपालिका अध्यक्षसहित २३ जनाले सफाइ पाएका छन् । सिरहाको लक्ष्मीपुर पतारि गाउँपालिकाका तत्कालिन अध्यक्ष रामबल्लभ शाह, उपाध्यक्ष आशादेवी यादब लगायतले बिहीबार बिशेष अदालतबाट सफाइ पाएका हुन् ।
स्थानीय पूर्वाधार विकास साझेदारी कार्यक्रम अन्र्तगत वडा नम्बर ४ मा पुल निर्माण गर्दा भ्रष्टाचार गरेको अख्तियार दुरुपयोग अनुसन्धान आयोगको अभियोग थियो । आर्थिक वर्ष २०७५–७६ मा पुल निर्माण गर्दा न्यून गुणस्तरको सामान प्रयोग गरेको र पुल अलपत्र पारेको छानबिनमा खुलेको थियो । जसमा ३१ लाख ७४ हजार भ्रष्टाचार भएको अख्तियारको दाबी थियो ।
गाउँपालिका अध्यक्ष र उपाध्यक्षसहित प्रमुख प्रशासकीय अधिकृत रबिन्द्र कुमार महत, लेखा अधिकृत कुमार कर्ण, वडा नम्बर ४ का अध्यक्ष बिद्यानन्द साह र वडा सचिव रामनारायण मण्डलविरुद्ध मुद्दा दायर भएको थियो । त्यस्तै, उपभोक्ता समितिका विष्णुदेव यादब लगायतविरुद्ध पनि मुद्दा परेको थियो ।
तत्कालिन प्रमुख प्रशासकीय अधिकृत धनिक लाल यादव र सुजित कुमार यादव, तत्कालीन लेखापाल नरेश कामैत, इन्जिनियर अमन पोखरेल, वडा नं. ३ का तत्कालीन वडा अध्यक्ष हनुमान मण्डललाई पनि मुद्दा चलेको थियो ।
उपभोक्ता समितिका समिति अध्यक्ष उतिम लाल मण्डल, कोषाध्यक्ष गिता कुमारी मण्डल, सचिव परमेश्वर मण्डल, प्रोपराइटर इन्जिनियर तारा कान्त साह पनि प्रीतवादी थिए ।
गाउँपालिकाको योजना शाखा प्रमुख चन्द्रेश्वर प्रसाद यादव तथा अन्य कर्मचारीहरू विष्णुदेव साह, अमृता देवी दास, सत्यनारायण साहले पनि सफाइ पाएका छन् ।
गत ७ बैशाख २०८० मा अख्तियारले बिशेष अदालतमा मुद्दा दायर गरेको थियो ।
