केन्द्र, प्रदेशदेखि वडाध्यक्षसम्म २५ स्थानमा जनप्रतिनिधि रिक्त, बैशाखमा उपनिर्वाचनको तयारीमा आयोग

काठमाडौं । राष्ट्रिय सभाको निर्वाचन सम्पन्न भएसँगै निर्वाचन आयोग उपनिर्वाचनमा जुटेको छ ।

स्थानीय तह, प्रदेश र केन्द्रमा समेत रिक्त जनप्रतिनिधि परिपूर्तिका लागि आयोगले आफ्नो काम थालेको हो । निर्वाचन आयोगले सरकारसँग अनौपचारिक रुपमा छलफलसमेत गरेको छ ।

सरकारसँगको छलफलपछि छिट्टै उपनिर्वाचनको मिति तय हुने निर्वाचन आयोगले जनाएको छ । आयोगले यसअघि यहि माघमा उपनिर्वाचन गर्ने तयारी गरेपनि राष्ट्रिय सभा निर्वाचनको कारण उपनिर्वाचनको मिति पर सरेको हो । आयोगले सकेसम्म बैशाखमै र सम्भव नभए जेठको पहिलो साता उपनिर्वाचन गर्नेगरी काम अगाडि बढाएको छ ।

संविधानको धारा २१५ को उपधारा ९ मा गाउँपालिकाको अध्यक्ष वा उपाध्यक्ष एक वर्षभन्दा बढी पदावधि बाँकी रहेको अवस्थामा रिक्त पदको पूर्ति उपनिर्वाचनबाट हुने व्यवस्था छ ।

यस्तै संविधानकै धारा २१६ को उपधारा ९ मा नगरपालिकाको प्रमुख वा उपप्रमुख एक वर्षभन्दा बढी पदावधि बाँकी रहेको अवस्थामा रिक्त पदको पूर्ति उपनिर्वाचनबाट हुने व्यवस्था छ । वडा अध्यक्षको हकमा पनि यही कानूनी व्यवस्था छ । ऐनको सोहि व्यवस्थालाई पालना गर्दै निर्वाचन आयोग उपनिर्वाचनको तयारीमा जुटेको हो ।

आयोगका अनुसार प्रतिनिधि सभा, प्रदेश सभा, जिल्ला समन्वय समिति र स्थानीय तह गरी कुल २५ पद रिक्त छन्, जसमध्ये दुई पद जिल्ला समन्वय समितिका प्रमुखको छ ।

आयोगका अनुसार देशचर १७ वडाध्यक्षको पद रिक्त छन् । नगर उपप्रमुख एक, गाउँपालिकाका अध्यक्ष एक र उपाध्यक्षको दुई पद रिक्त छन् । प्रतिनिधि सभा सदस्य र प्रदेश सभा सदस्यको एक एक पद रिक्त छन् ।

यसरी रिक्त हुनेहरुमा गत वर्ष सम्पन्न आम निर्वाचनमा ईलाम २ बाट निर्वाचित संविधान सभाका अध्यक्ष, पूर्व सभामुख नेकपा एमालेका उपाध्यक्ष तथा संसदीय दलका उपनेता सुवासचन्द्र नेम्बावङको निर्वाचन क्षेत्र इलाम २ रहेको छ । नेम्वाङको गत भदौ २६ गते आकस्मिक निधन भएपछि संघीय संसद्मा एक सिट खाली रहेको हो । यसैगरी सवारी दुर्घटनामा परी प्रदेश सभा सदस्य एवं सुदूरपश्चिम प्रदेशका कानुनमन्त्री पृथ्वीबहादुर सिंहको निधन भएसँगै उनी निर्वाचित बझाङ १ (१) रिक्त भएको निर्वाचन आयोगले जनाएको छ ।

जिल्ला समन्वय समिति कैलालीका प्रमुख पदमबहादुर कलेल अघिल्लो पुसमा मिर्गौला फेल भएर निधन भएपछि यो पद रिक्त छ । त्यस्तै ओखलढुंगाका जिसस प्रमुख डिल्लीराम खनाल गत १३ असोजमा उपचारका क्रममा निधन भएपछि पद रिक्त छ ।

दैलेखको महाबु गाउँपालिका अध्यक्ष लछुमन गुरुङको उच्च रक्तचापका कारण गत माघमा निधन भएपछि यो पद पनि रिक्त छ । दोलखाको गौरीशंकर गाउँपालिका उपाध्यक्ष श्यामसुन्दर तामाङको हृदयाघातबाट निधन भएपछि पद रिक्त छ ।

नलगाड नगरपालिकाकी उपप्रमुख सरिता सिंहको गत कार्तिक १७ गते गएको विनासकारी भूकम्पमा परेर ज्यान गएको हो । उनी नेपाली कांग्रेसको तर्फबाट निर्वाचित उपमेयर हुन् ।

त्यस्तै बाजुराको स्वामिकार्तिक खापर गाउँपालिकाकी उपाध्यक्ष मैना जोशीको गत माघ ४ गते निधन भएको थियो । उनी पनि नेपाली कांग्रेसको तर्फबाट निर्वाचिन पालिका उपाध्यक्ष हुन् ।

यी वडा जहाँ पद रिक्त छन् ।

गढी गाउँपालिका ६– वडाध्यक्ष सदानन्द उरावं

त्रियुगा नगरपालिका १२–वडाध्यक्ष चुडाराज काफ्ले

इशनाथ नगरपालिका ६ – वडाध्यक्ष….

राजपुर नगरपालिका ६– वडाध्यक्ष शेख मोजरे आलम

कीर्तिपुर नगरपालिका ४– वडाध्यक्ष श्यामकुमार अधिकारी

ककनी गाउँपालिका २– वडाध्यक्ष तिलकबहादुर लामा

हेटौंडा उपमहानगरपालिका १२– वडाध्यक्ष ललितबहादुर घलान (जिसस प्रमुख बनेका )

गोरखा नगरपालिका ५– वडाध्यक्ष खिलबहादुर लामा

रुन्टिगढी गाउँपालिका ४– वडाध्यक्ष टंकबहादुर पुन

ठाकुरबाबा नगरपालिका ४– वडाध्यक्ष सूर्यबहादुर विष्ट (जिसस प्रमुख बनेका)

तिलागुफा नगरपालिका ४–वडाध्यक्ष परमबहादुर शाही