काठमाडौं । निर्जीवन बिमा व्यवसायमा सुस्तता आएको छ । अर्थतन्त्रमा आएको सुस्तताले बैंक तथा वित्तीय क्षेत्रमा मात्र नभई बिमा क्षेत्रमा पनि असर गरेको हो । बिमा क्षेत्रको नियामक बिमा प्राधिकरणका अनुसार निर्जीवन बिमा कम्पनीको व्यवसाय ३.१९ प्रतिशतले घटेको छ । पोलिसी परित्याग गर्ने, बिमा नै नगर्ने लगायतका कारण बिमा क्षेत्रमा समस्या सृजना भएको हो । आर्थिक गतिविधि खुम्चिएका कारण आर्थिक वर्षको सुरुवातदेखि नै बिमा व्यवसायमा संकुचन आएको हो ।
बिमा प्राधिकरणका अनुसार १४ वटा निर्जीवन बिमा कम्पनीले दोस्रो त्रैमाससम्म १९ अर्ब ४४ करोड बिमा शुल्क संकलन गरेका छन् । यो रकम गत आवको दोस्रो त्रैमासको तुलनामा ६४ करोड कम हो । निर्जीवन बिमा कम्पनीहरूले गत आवको दोस्रो त्रैमाससम्म २० अर्ब रुपैयाँको व्यवसाय गरेका थिए ।
निर्जीवन बिमा कम्पनीमध्ये राष्ट्रिय बिमा कम्पनीको व्यवसायमा सर्वाधिक गिरावट आएको छ । यो कम्पनीको व्यवसाय ५०.७५ प्रतिशतले घटेको छ । कम्पनीले चालु आवको पुससम्म ६९ करोड ३४ लाख रुपैयाँ बिमा शुल्क संकलन गरेको छ । गत आवको सोही अवधिमा यस कम्पनीले १ अर्ब ४० करोड रुपैयाँको व्यवसाय गरेको थियो । पुस मसान्तसम्ममा १४ मध्ये ६ निर्जीवन बिमा कम्पनीको व्यवसाय खुम्चिएको छ ।
निर्जीवन बिमा व्यवसायमा सर्वाधिक बजार हिस्सा शिखर इन्स्योरेन्सको छ । यो कम्पनीले पुससम्ममा २ अर्ब ४५ करोडको व्यवसाय गरेको छ । गत आवको सोही अवधिको तुलनामा यो ७.६० प्रतिशत कम हो । व्यवसाय विस्तार गर्ने ८ कम्पनीमध्ये दि ओरियन्ट इन्स्योरेन्स सबैभन्दा अगाडि छ । यो कम्पनीले ६ महिनामा अघिल्लो वर्षको तुलनामा ३३.३१ प्रतिशतले व्यवसाय विस्तार गरेको छ । उसले पुससम्म ९३ करोड ५१ लाख रुपैयाँ प्रिमियम आर्जन गरेको छ । व्यवसाय गर्ने अनुमति पाएका चार निर्जीवन लघुबिमा कम्पनीमध्ये तीन वटाले ६ महिनामा ४ करोड ५० लाख रुपैयाँ प्रिमियम संकलन गरेको पनि बिमा प्राधिकरणले जनाएको छ ।
निर्जीवन बिमा व्यवसायमा संकुचन देखिएपनि जीवन बिमातर्फ भने केही सुधार भएको छ । चालु आर्थिक वर्षको पुससम्मा जीवन बिमा कम्पनीले ७४ अर्ब २४ करोड रुपैयाँ बिमा शुल्क संकलन गरेका छन् । गत आवको दोस्रो त्रैमाससम्म जीवन बिमा कम्पनीले ७१ अर्ब ७५ करोड रुपैयाँ प्रिमियम आर्जन गरेका थिए । यो वर्ष व्यवसाय थप २ अर्ब ५६ करोड रुपैयाँले बढेको छ । पुस मसान्तसम्म जीवन बिमा कम्पनीले प्रथम बिमा शुल्कबापत १३ अर्ब ८४ करोड रुपैयाँ संकलन गरेका छन् । यो रकम गत आवको दोस्रो त्रैमासको तुलनामा २.३६ प्रतिशत कम हो । गत आवको सो अवधिसम्म जीवन बिमा कम्पनीहरुले प्रथम बिमा शुल्क १४ अर्ब १७ करोड रुपैयाँ संकलन गरेका थिए ।
चालु आवको दोस्रो त्रैमाससम्ममा राष्ट्रिय बिमा कम्पनीको व्यवसाय सर्वाधिक २२.५७ प्रतिशतले घट्दा सन नेपालको ८.४३ र लाइफ इन्स्योरेसन कर्पोरेसनको १.१८ प्रशितले घटेको छ । यस्तै चालु आवको दोस्रो त्रैमाससम्ममा सबैभन्दा धेरै बिमा शुल्क नेपाल लाइफले आर्जन गरेको छ । यस कम्पनीले २० अर्ब रुपैयाँ बिमा शुल्क संकलन गरेको हो । कम्पनीले गत आवको दोस्रो त्रैमासको तुलनामा चालु आवको सोही अवधिमा ७.४६ प्रतिशत बढी बिमाशुल्क संकलन गरेको छ ।
दोस्रो त्रैमासमा सबैभन्दा बढी व्यवसाय बढाउने जीवन बिमा कम्पनीमा प्रभु महालक्ष्मी लाइफ इन्स्योरेन्स अगाडि छ । यस कम्पनीले चालु आवको पुससम्ममा २ अर्ब ३ करोड ८३ लाख बिमा शुल्क आर्जन गरेको छ । गत आवको सोही अवधिसम्मको तुलनामा कम्पनीले १४.०१ प्रतिशत बढी संकलन गरेको हो । सन नेपाल लाइफले भने सबैभन्दा कम १ अर्ब ७८ करोड रुपैयाँको व्यवसाय गरेको छ ।
