काठमाडौं । राजश्व अनुसन्धान विभागले क्षेत्रपाटीबाट बरामद गरेको हुण्डीको रकम अझै गनेर नसकिएको जनाएको छ । बिहिबार बेलुका विभागले गरेको विशेष अपरेसनमा नरेश अग्रवालसहित ४ जना पक्राउ परेका छन् । विभागका सूचना अधिकारी नवराज अधिकारीका अनुसार अग्रवालको घरबाट बरामद गरिएको रकम अझै गनेर सकिएको छैन ।

शुक्रबार मध्यन्न १२ बजेसम्म २ करोड ३० लाख रुपैयाँ गन्न भ्याइएको छ । विभागको अनुसन्धान टोलीले अझै बरामद भएको रकम गनिरहेका छन् । हालसम्म २ करोड ३० लाख नेपाली रुपैयाँ, २ हजार अमेरिकी डलर गनिसकिएको विभागले जनाएको छ ।

न्यूरोड र क्षेत्रपाटी क्षेत्रमा होलसेल कपडाको व्यापार गर्ने अग्रवालले अवैध हुण्डीको कारोबार गर्ने गरेको विशेष सूचनाका आधारमा विभागले बिहिबार विशेष कारबाही अघि बढाएको थियो । नगदसहित पक्राउ परेका अन्य ३ जनाको भने विभागले परिचय खुलाएको छैन् । यस प्रकरणमा थप अनुसन्धान गरिरहेको पनि विभागले जनाएको छ ।