काठमाडौं । प्रधानमन्त्री पुष्पकमल दाहाल ‘प्रचण्ड’ले हिजोका सामन्तहरू सरकारले गरेको कामदेखि छटपटिएको टिप्पणी गरेका छन् । उनले सरकारले गरेको राम्रो काम देखेर सामन्ती दलालहरु आँत्तिएको र गठबन्धनलाई बदनाम गर्नेतिर लागेपनि उनीहरू सफल नहुने दाबीगरे ।
आज (बुधबार) गोरखाको बारपाक सुलिकोट गाउँपालिकामा आयोजित कार्यक्रममा बोल्दै प्रधानमन्त्री दाहालले यस्तो बताएका हुन् । सो क्रममा उनले आफू नेतृत्वको वर्तमान सत्ता गठबन्धन पाँचै वर्ष टिक्ने पनि दाबी गरे । उनकाअनुसार सत्ता गठबन्धन अहिले झनै बलियो भएको छ। यद्धपी उनले एकथरी तत्त्वहरूलाई सरकारको काम मन नपरेको सुनाए ।
सम्बोधनको क्रममा उनले भने,‘जति जे जे षड्यन्त्रहरू भएका छन् हाम्रो गठबन्धन अझ बलियो हुँदै गएको छ । अझ सुदृढ हुँदै गएको छ । र यो गठबन्धन पाँचै वर्ष जान्छ’, प्रचण्डले भने, ‘एक वर्ष न बित्यो एक वर्ष बित्दा यति काम भएका छन् भने अर्को चार वर्ष यो गठबन्धन हुँदा हाम्रो अपेक्षाहरू पूरा गर्ने दिशामा ठूला ठूला सफलता हासिल गर्न सक्छौँ ।’
