काठमाडौं । कांग्रेस सभापति शेरबहादुर देउवाले नेता रामचन्द्र पौडेललाई कुनै भूमिका नदिएको भनी विगतमा आफूमाथि लागेको आरोप निवारण भएको बताएका छन्।
आठ दलीय गठबन्धनका संघीय सांसदहरुका लागि आज (बिहीबार) काठमाडौंमा भएको अभिमुखीकरण कार्यक्रममा आठ दलीय गठबन्धनले संघीय सांसदका लागि राखेको अभिमुखीकरण कार्यक्रममा बोल्ने क्रममा देउवाले राष्ट्रपतिको उम्मेदवार पौडेललाई बनाएर न्याय गरेको बताएका हुन्।
‘रामचन्द्रजीलाई मैले कुनै भूमिका नदिएको भन्ने आरोप लाग्दै आएको थियो होला, अब राष्ट्रपति बनाउँदैछौं,’ उनले भने, ‘उहाँ धेरै पहिलेदेखि मेरो साथी हो। लोकतन्त्र र प्रजातन्त्रका लागि उहाँले धेरै दुःख पाउनुभएको छ। मलाई उहाँबारे सोच्दा खटपट भइरहन्थ्यो। त्यसकारण अहिले उहाँलाई राष्ट्रपति पदको उम्मेदवार बनाउने निर्णय गरेका हौं। यो अत्यन्तै महत्त्वपूर्ण घडीमा उहाँलाई अघि सारेका हौं।’
अहिले राष्ट्रपतिका लागि पौडेल सबैभन्दा योग्य र उपयुक्त उम्मेदवार रहेको उनले बताए। पौडेललाई निर्वाचित गर्दा विगतमा जस्तो संविधान च्यात्ने जोखिम नहुने उनको भनाइ थियो। ‘विगतमा हामीले राष्ट्रपतिको विषयमा निकै नमिठो अनुभव सँगाल्यौं,’ उनले भने, ‘तर अब रामचन्द्रजीलाई राष्ट्रपति बनाएपछि त्यस्तो जोखिम रहँदैन।’
राष्ट्रपतिमा निर्वाचित भएर पौडेलले संविधानको पालना गरी लोकतन्त्रप्रतिको आस्था जगाउने काममा भूमिका निर्वाह गर्ने विश्वास व्यक्त गरे।
