काठमाडौं । राष्ट्रपतिको निर्वाचन नजिकिएसँगै नेकपा (एमाले) का अध्यक्ष केपी शर्मा ओली सर्वाधिक दबाबमा परेका छन् । कुनैपनि हालतमा आफ्नो दलको उम्मेदवार राष्ट्रपतिमा निर्वाचित हुने दाबी गर्दै आएका ओलीले राष्ट्रपतिको उम्मेदवारी दिने दिन आउँदै गर्दा भने दबाब महशुस गर्न थालेका छन् ।
सत्ता गठबन्धनमा राष्ट्रपति एमालेले पाउने सहमति भएको थियो । तर, २६ पुषमा प्रधानमन्त्री पुष्पकमल दाहालले संसद्मा विश्वासको मत लिने क्रममा कांग्रेसको पनि मत पाएपछि भने राजनीतिक परिस्थिति फेरिएको छ ।
प्रधानमन्त्री दाहाल एमालेसँगको गठबन्धन तोडेर कांग्रेससहितको नयाँ गठबन्धन बनाउने रणनीतिमा छन् । उनले त्यसको लागि कांग्रेस नेतृत्वसँग निरन्तर सम्वाद गरेका छन् । कांग्रेसले पनि पुष १० गते सरकार गठन गर्ने बेलामा दाहाललाई प्रधानमन्त्री नदिएर गल्ती गरेको महशुस गरेको छ । अब पूरानो कुरा बिर्सिएर अघि बढ्न कांग्रेस सभापति शेरबहादुर देउवाले दाहालसमक्ष प्रस्ताव राखेका छन् । सरकार गठन भएको १०० दिनपनि नपुग्दै राजनीतिक अस्थिरता निम्तिने खतरा बढेको भन्दै कांग्रेस र माओवादी केन्द्रका शीर्ष नेताहरु सहकार्यको लागि तयार भएका हुन् । तर, एमाले नेतृत्वले भने माओवादीबाट धोका हुन लागेको निश्कर्ष निकालेको छ । पुष १० गते नै राष्ट्रपति एमालेले पाउने सहमति भएको उनीहरुको दाबी छ । माओवादी केन्द्रका नेताहरुले भने राष्ट्रपति एमालेलाई दिने कुनै सहमति नभएको दाबी गरेका छन् ।
राष्ट्रपति निर्वाचनले एमाले अध्यक्ष ओलीले दबाब महशुस गर्नुको कारण कांग्रेस उम्मेदवारले जिते अहिलेको गठबन्धन भत्किने र एमालेले केन्द्रदेखि प्रदेशसम्मको सरकारबाट हात झिक्नुपर्ने भय छ । ओली कुनैपनि हालतमा राष्ट्रपति आफूले अघि सार्ने व्यक्तिले जित्नुपर्नेमा छन् । माओवादीले कुनैपनि हालतमा एमालेले अघि सार्ने व्यक्तिलाई राष्ट्रपतिमा नसघाउने अडान लिएको छ ।
ओलीले कम्युनिष्ट आन्दोलन र वामपन्थीहरुबीचको सहकार्यको लागि पनि माधव नेपाललाई राष्ट्रपतिमा अघि सार्ने तयारी गरेका छन् । माधव नेपाललाई अघि सारे प्रचण्डले पनि मान्नुपर्ने बाध्यता छ । लामो समयसम्म प्रचण्डसँग सहकार्य गरेका माधव नेपाल एमालेसँग एकताको शर्तसहित राष्ट्रपति बन्न तयार भएको चर्चा छ । तर, यो विषयमा अहिलेसम्म दुवै दलबाट औपचारिक कुरा बाहिर आएको छैन् । यो बीचमा ओली र नेपालले गोप्य मन्थना पनि गरिसकेको स्रोतको दाबी छ ।
प्रधानमन्त्री दाहालले आइतबारको कांग्रेस नेताहरुसँगको भेटवार्तामा नै ओलीले माधव नेपाललाई अघि सार्नसक्ने आँकलन सुनाएका थिए । त्यस्तो अवस्थामा भने आफू अप्ठ्यारोमा पर्ने उनको भनाई थियो । प्रचण्ड पनि ओलीको पछिल्लो कदमबाट सशंकित बनेका छन् । माधव नेपाललाई देखाएर आफूमाथि दबाब बढाउन कतै ओलीले चाल चालेको त होईन ? भन्नेमा उनी सशंकित छन् ।
प्रचण्ड कुनैपनि हालतमा कांग्रेससँग सहकार्यको लागि अघि बढिसकेका छन् । कुनै चमात्कारिक फेरबदल नआए राष्ट्रपतिमा माओवादीले कांग्रेसले अघि सार्ने उम्मेदवारको पक्षमा मत हाल्ने सम्भावना छ । प्रचण्डलाई कांग्रेसले पाँचै वर्ष सरकारको नेतृत्वो लागि प्रस्तावसमेत गरेको छ । यस्तो अवस्थामा प्रचण्डले कांग्रेससँग राष्ट्रपतिको निर्वाचनअघि नै सत्ता साझेदारीको लागि लिखित सहमतिको अपेक्षा राखेका छन् । रवि लामिछाने नेतृत्वको रास्वपाले भने राष्ट्रपतिको निर्वाचनबारे अहिलेसम्म कित्ता क्लियर गरेको छैन् ।
फेसबुकबाट तपाईको प्रतिक्रिया !