काठमाडौं। नाडा अटोमोबाइल्स एशोसिएसन अफ नेपालले (नाडा) ले भन्सार विभागका महानिर्देशकसँग भन्सारमा अड्किएका सवारीसाधनहरुको जाँचपासका सम्बन्धमा छलफल गरेको छ।नाडाले मंगलबार भन्सारमा अड्किएका गाडीहरुको जाँचपासका सम्बन्धमा भन्सार विभागका महानिर्देशक च्रक्रबहादुर बुढासँग छलफल गरेको हो।
नाडाका उपाध्यक्ष राजनबाबु श्रेष्ठको नेतृत्वमा गएको प्रतिनिधिमण्डलले महानिर्देशक बुढासँग नाकाहरुमा अड्किएका गाडीहरुको भन्सार जाँचपासका सम्बन्धमा विस्तृत छलफल गरेको नाडाले जनाएको छ।
छलफलमा नाडा उपाध्यक्ष श्रेष्ठले सरकारले विभिन्न चरणमा ल्याएका नीतिहरुको कारण अटोमोबाइल व्यवसायीहरु धरासायी हुने अवस्थामा पुगेको बताए। बैंक तथा वित्तीय संस्थाहरुले तोकेको उच्च ब्याजदर, अटो लोन र हायर पर्चेज कर्जामा जोखिम भार १५० प्रतिशतमा पुर्याइएका कारण गाडी छुटाउन नसकिएको श्रेष्ठले बताएका छन्।
यसैगरी बैंकहरुबाट नीजि सवारीसाधनको हायर पर्चेज लोन प्रवाह गर्ने प्रक्रियामा लोन टु भ्यालु रेसियोको सीमा ५० प्रतिशत पुर्याइएका कारण बजारमा सवारीसाधनहरु बिक्री हुन नसकेको बुढालाई नाडा टोलीले ब्रिफिङ गरेको छ।जसका कारण सवारीसाधन पैठारीकर्ताहरुले भन्सारमा आइपुगेका सवारीसाधनहरुको भन्सार जाँचपास गर्न नसकेको श्रेष्ठले महानिर्देशक बुढालाई बताएका थिए। यस्तै छलफलमा श्रेष्ठले व्यवसायिक महत्वका सवारी तथा ढुवानीका साधनहरुको बिक्री समेत दुई तिहाइले घटेको जानकारी गराएका छन्।
नाडाका पूर्व अध्यक्ष सुनिल खेतानले भन्सार जाँचपासका लागि विभागले तोकेको सबै कागजातहरु पेस गर्दा पनि भन्सार जाँचपासमा कठिनाइ भइरहेको गुनासो गरेका छन्। यसैगरी नाडाका महासचिव सुरेन्द्रकुमार उप्रेतीले अनधिकृत आयात नियन्त्रणका लागि विभागले आवश्यक पहल गर्नुपर्ने भन्दै कम्प्युटर बिलिङलाई अनिवार्य गर्नुपर्ने धारणा राखेका छन्।
टु ह्वीलर समितिका सभापति अभिक ज्योतिले उच्च ब्याजदरका कारण मोटरसाइकलको आयातमा ५० प्रतिशतले कमी आएको बताए। उक्त छलफलमा महानिर्देशक बुढाले सरकारलाई राजश्व संकलनको दबाब परिरहेको बताउँदै विभागले व्यवसायीहरुको मागलाई सम्बोधन गर्ने आश्वोसन दिएका छन्।
नाडाका अनुसार बुढाले नेपालका भन्सार नाकाहरुमा आइसकेका सवारीसाधनहरुको भन्सार जाँचपासका लागि आग्रह गर्दे नेपालका भन्सार नाकाहरुमा कुन कुन ब्राण्डका के कति सवारीसाधनहरु छन् त्यसको तथ्यांक उपलब्ध गराउन समेत आग्रह गरेका छन्।
फेसबुकबाट तपाईको प्रतिक्रिया !