काठमाडौं । प्राविधिकतर्फको सचिव पद रिक्त भएको दुई हप्ता बित्न लाग्दा पनि बढुवा सिफारिस समितिको बैठक बसेको छैन । स्वदेशमा हुँदा बढुवा सिफारिस समितिको बैठक राख्न आनाकानी गर्दैआएका लोकसेवा आयोगका अध्यक्ष माधवप्रसाद रेग्मी बैठक नै नराखी विदेशमा सयरमा निस्किएका छन् ।
रेग्मी शुक्रबार नेपाल फर्किने बताइएको छ । उनी फर्किए पनि तत्काल बढुवा समितिको बैठक बस्ने छाँटकाँट देखिएको छैन । किनभने रिक्त सचिव पदपूर्तिका लागि प्रधानमन्त्री तथा मन्त्रिपरिषदको कार्यालयले निर्वाचन आयोगसँग सहमति माग गरेको छैन ।
निर्वाचन आचारसंहिता जारी नै रहेका कारण रिक्त सचिव पदपूर्तिका लागि आयोगको सहमति आवश्यक छ । आइतबार आयोगमा सहमति माग गरियो भने पनि सोमबार बस्ने मन्त्रिपरिषदको बैठकमा निर्णय हुनेगरी बढुवा समितिलाई सिफारिस गर्न समयको चाप हुन्छ । बढुवा समितिलाई अलमल्याउने काम तेस्रो बरियतामा रहेका सचिव बढुवाका दाबेदार सहसचिव अर्जुनजंग थापाले गर्दैआएको आरोप छ ।
सडक विभागका महानिर्देशक समेत रहेका थापा आफ्नो बढुवासँगै भौतिक पूर्वाधार तथा यातायात मन्त्रालयमा पदस्थापनको सुनिश्चितता खोजिरहेका छन् । सोही कारण बढुवा समितिका अध्यक्ष रेग्मीलाई समेत थापाले प्रभावमा पारेको अड्कलबाजी हुने गरेको छ ।
मंसिर १२ गते वन तथा भूसंरक्षण मन्त्रालयका सचिव पेमनारायण कँडेलले अनिवार्य अवकाश पाएसँगै वन मन्त्रालय सचिवविहीन छ । मन्त्रीविहीन रहेको उक्त मन्त्रालय प्रधानमन्त्री शेरबहादुर देउवाले सम्हाल्दैआएका थिए ।
यहीबीचमा निमित्त सचिवको भरमा चल्नुपर्दा वन मन्त्रालयको प्रशासनिक र राजनीतिक नेतृत्व कार्यवाहकको भरमा चलिरहेको छ । वनमा आउनका लागि कृषिको पशुपंक्षी हेर्ने सचिव दीपककुमार खरालले इच्छा देखाएका छन् । यसका लागि उनले शक्तिकेन्द्र्रहरु रिझाउन थालिसकेका छन् । वन तथा कृषि समूहको सचिव बढुवा हुनेवित्तिकै खराल वनमा आउन आतुर छन् ।
फेसबुकबाट तपाईको प्रतिक्रिया !