निर्वाचनको सुरक्षाका लागि उच्च मनोबलका साथ काम गर्न डीआईजी खाँको निर्देशन

जनकपुर । मधेश प्रदेश प्रहरी कार्यालय जनकपुरका प्रमुख प्रहरी नायव महानिरीक्षक ( डीआईजी ) मसऊद आलम खाँले उच्च मनोबलका साथ काम गर्न प्रहरी कर्मचारीलाई निर्देशन दिएका छन् ।

मङ्सिर ४ गते हुने प्रतिनिधिसभा र प्रदेशसभा सदस्यको निर्वाचनमा कसैको प्रलोभन, डर, त्रास, धम्की वा अवरोधबाट माथि उठेर मतदाताले विवेकको मत हाल्न पाउने वातावरण सिर्जनाका लागि उच्च मनोबलका साथ काम गर्न मधेस प्रदेश मातहतका ८ वटै जिल्ला प्रहरी प्रमुखलाई निर्देशन दिएका हुन् ।

निर्वाचन सुरक्षा सम्बन्धि निर्देशन कार्यक्रम सम्पन्न

मधेस प्रदेश तालिम केन्द्र जनकपुर सम्पर्क कार्यालय राजविराज , सप्तरीमा प्रहरी नायव महानिरीक्षक मसऊद आलम खाँले यही मंसिर ४ गते हुने प्रदेश सभा तथा प्रतिनिधि सभा सदस्य निर्वाचन २०७९ निर्वाचन सुरक्षा योजना अनुरूप कार्यक्षेत्र तर्फ जान लागेका मधेस प्रदेश तालिम केन्द्रमा कार्यरत प्रहरी कर्मचारीहरु लगायत प्रहरी जवान आधारभूत तालिमका प्रशिक्षार्थी र जिल्ला प्रहरी कार्यालय सप्तरी तथा मातहत कार्यालयहरुको प्रहरी कर्मचारीहरू ,म्यादी प्रहरी समेतलाई उच्च मनोबलका साथ निश्पक्ष ,भय रहित र शान्तिपुर्ण रुपमा निर्वाचन सम्पन्न गर्न निर्देशन दिएका छन् ।

उनले भने, “मङ्सिर ४ गते हुने निर्वाचनलाई शान्तिपूर्ण रूपमा सम्पन्न गराउन चनाखो भएर लाग्नुहोस् ।”

उक्त अवसरमा मधेस प्रदेश तालीम केन्द्रका समादेशक प्रहरी वरिष्ठ उपरीक्षक रविन्द्र केसिले मधेश प्रदेश प्रहरी प्रमुख प्रहरी नायव महानिरीक्षक मसऊद आलम खाँलाई स्वागत तथा धन्यवाद ज्ञापन गर्नु हुदै शान्ति सुक्षा सम्बन्धि आफ्नो मन्तव्य समेत राख्नु भयो ।

कुनै दल र उम्मेदवारले मतदातालाई प्रभावित पार्न नगद वा जिन्सी सामान दिएको पाइएमा ठाउँको ठाउँ कारबाही गर्न ८ वटै जिल्ला प्रहरी प्रमुखलाई अधिकार सुम्पिएको स्पष्ट गर्दै उनले मतदाता, मतपेटिका र मतगणना कार्यको सुरक्षा गरेर निर्वाचनको निष्ठा जोगाउन आग्रह गरे ।

“मतदान केन्द्रमा सही मतदाता आएका छन् या अवरोध गर्ने तत्वहरू आएका छन्, त्यसको सूक्ष्म विश्लेषण गर्नुस् । केन्द्रभन्दा बाहिरको वातावरण र सुरक्षाबारे फैलन सक्ने भ्रम चिरेर कोही आत्तिनु पर्दैन”, उनले भने ।

प्रहरी नायब महानिरीक्षक खाँले थपे, “ढुक्कले मतदानमा सहभागी हुन सकिन्छ भन्ने सन्देश आम मतदातालाई उत्साहका साथ सुरक्षाको प्रत्याभूति गराउनुस् ।” प्रहरी नायब महानिरीक्षक खाँले मतपत्र र मतपेटिकामा कसैले छड्के आँखा (कुदृष्टि) लगाएमा, सम्झनुस्, त्यो तपाइँका विरुद्धको कुदृष्टि हो भने । उनले भने, “त्यसलाई ठाउँको ठाउँ कारबाही गर्नुस् ।”