मोरङ । मोरङको विराटनगर महानगरपालिका–११ स्थित न्यू अप्सरा गेस्ट हाउसमा असोज २८ मा १७ वर्षीय अंशु सदाको हत्या परिवारले फिरौती रकम नदिएपछि भएको पाईएको छ ।
सिरहा गोलबजार घर भएका अंशु आफ्ना दुईजना साथीहरुसँग विराटनगर गएका थिए । असोज २६ मा उनीसँगै धनुषाको कमल नगरपालिका–६ घर भएका १८ वर्षीय राकेश ठाकुर र १८ वर्षका प्रशान्त मण्डल उर्फ बिसु विराटनगर गएका हुन् । मृतक अंशु र अरु दुईजना साथी हुन् ।
विराटनगरबाट उनीहरुले अंशुको परिवारलाई फोन गरेर ‘छोरा अपहरण गरेका छौ, जिवित चाहिए १ लाख पठाउनु’ भनेका थिए । सो रकम नपठाएपछि दुईजना मिलेर उनको हत्या गरेको अनुसन्धानबाट थाहा भएको जिल्ला प्रहरी कार्यालय मोरङका डिएसपी दिपक श्रेष्ठले बताए ।
अप्सरा गेस्ट हाउसको कोठामा हत्या गरेर आरोपीहरुले अंशुको शव बक्स पलङमुनि लुकाएका थिए ।
फोनबाट फिरौती मागेपछि पीडित परिवारले ईलाका प्रहरी कार्यालय गोलबजारमा निवेदन दिए । कमजोर आर्थिक अवस्था भएका परिवारले छोरा फिर्ता आउने आशमा १० हजार नगद पनि पठाए । सो रकम निकाल्न जाँदा प्रहरीले ३ जनालाई पक्राउ गरेको छ । १० हजार रकम रिसिभ गर्नुअघि नै उनीहरुले अंशुको हत्या गरेको अनुसन्धानमा संलग्न एकजना अधिकृतले रातोपाटीलाई बताए ।
पक्राउ पर्नेमा अंशुका दुईजना साथीहरु धनुषाको कमल नगरपालिका–६ घर भएका १८ वर्षीय राकेश ठाकुर र १८ वर्षका प्रशान्त मण्डल उर्फ बिसु छन् । मोरङको रतुवामाई नगरपालिका–५ घर भएका २६ वर्षीय मनोज कार्कीलाई पनि प्रहरीले पक्राउ गरेको छ ।
पीडित परिवारले पठाएको १० हजार रकम निकाल्ने बेलामा मनोजको पनि उपस्थिति देखिएको हुनाले उनलाई पनि पक्राउ गरिएको अनुसन्धानमा संलग्न एकजना प्रहरी अधिकृतले बताए । पैसा निकाल्न उनले ‘सिटि सफारी’ चढाएर आरोपीहरुलाई आइएमई सेन्टरसम्म लगेको थाहा भएको छ ।प्रहरी स्रोतका अनुसार आरोपीहरु र मृतक लागुऔषध प्रयोगकर्ता हुन् ।
