राजविराज । सशस्त्र प्रहरी बलका प्रहरी सहायक निरीक्षक (असई) मृत भेटिएका छन् । सशस्त्र प्रहरी बल गण नम्बर ६ हेडक्वार्टर राजविराजमा दरबन्दी भई बोर्डर आउट पोष्ट (बीओपी) छिन्नमस्तामा कार्यरत असई सत्यनारायण यादव भारतमा मृत भेटिएका हुन् ।
उनी बिहार राज्यको मधुवनी जिल्लाअन्तर्गत जिरोगा पुनर्वासस्थित घोडदह खोलामा मृत फेला परेको जनाइएको छ । यादवको शरीरमा लुगा नभएको र टाउकोमा चोट रहेको बताइएको छ ।
दशैंका लागि तीन दिन विदामा घर गएका यादव शुक्रबारदेखि कार्यालयमा हाजिर हुनुपर्ने थियो तर नेपाल भारत सीमाभन्दा ३ किलोमिटर दक्षिण भारतमा रहेको घोडदहमा यादव मृत भेटिएका हुन् ।
सिरहाको भगवानपुर २ घर भएका असई यादव असोज १८ गतेदेखि ३ दिन बिदामा रहेको सशस्त्र प्रहरी बल गण नम्बर ६ हेडक्वार्टर राजविराजका गणपति सशस्त्र प्रहरी उपरीक्षक प्रदीप खड्काले बताए ।
भारतीय प्रशासनले यादवको शव नेपाली सुरक्षाकर्मीको जिम्मा लगाएको छ । असई यादवको शव अहिले गजेन्द्रनारायण सिंह अस्पताल राजविराज ल्याइएको छ । पोस्टमार्टम रिपोर्ट पछि हत्या वा मृत्युबारे खुल्ने प्रहरीले जनाएको छ ।
