लहान । प्रहरी महानिरीक्षक ( आईजीपी ) धिरज प्रताप सिंहले प्रहरी अनुसन्धान टिमलाई अझै बलियो बनाई हरेक अनुसन्धान सफल पार्न प्रहरी कर्मचारीहरु कटिबद्ध हुनुपर्ने बताएका छन् ।
मधेस प्रदेश प्रहरी कार्यालय जनकपुरधाम र १ नम्बर प्रदेश प्रहरी कार्यालय विराटनगरका प्रमुखको जनकपुरधाम र विराटनगरस्थित सम्पूर्ण प्रहरी कार्यालयका वरिष्ठ प्रहरी अधिकृत एवम् कार्यालय प्रमुखलाई निर्देशन दिँदै प्रहरी महानिरीक्षक सिंहले उक्त कुरा बताएका हुन् ।
अपराध अनुसन्धान एवं शान्ति सुरक्षा कायम गर्ने कार्यमा कानुनसम्मत कठोर बन्दै उत्कृष्ट काम गर्न प्रहरी महानिरीक्षक सिंहले प्रहरी कर्मचारीहरुलाई निर्देशन दिए । दक्षिण एशियामै नेपाल प्रहरी उत्कृष्ट भएको चर्चा गर्दै उनले अपराध अनुसन्धान, शान्ति सुरक्षा कायमको साथै समाज सुधारका काममा अझै उच्च मनोबलका साथ काम गर्नुपर्नेमा जोड दिए ।
भ्रष्टाचारमा शून्य सहनशीलताको नीतिलाई अवलम्बन गर्दै काममा चुस्त दुरुस्त रहनुपर्ने उल्लेख गर्दै प्रहरी महानिरीक्षक सिंहले बर्दीको इज्जत र प्रतिष्ठा कायम राख्न असल चरित्र भएकासँग मात्र संगत गर्नुपर्नेमा जोड दिए । कार्यालय व्यवस्थापन, सरसफाइ, व्यक्तिगत टर्नआउट लगायतका काममा विशेष ध्यान दिन निर्देशन दिँदै प्रहरी महानिरीक्षक सिंहले कार्यालयको अभिलेख, योजना र अनुगमनलाई थप चुस्त दुरुस्त रुपमा प्रस्तुत गर्नुपर्ने बताए ।
नेपाल प्रहरीका रणनीति, योजना र दृष्टिकोणहरु तल्लो तहसम्म पुर्याउन सबैले पहल गर्नुपर्ने उल्लेख गर्दै प्रहरी महानिरीक्षक सिंहले उच्च मनोबल र नैतिक परिवर्तनका लागि संगठनद्वारा अवलम्बन गरिएका नीतिलाई गम्भीरतापूर्वक लिई सक्रिय रुपमा प्रस्तुत हुनुपर्ने बताए ।
सूचना प्रविधि, बेरुजु फर्छौट लगायतका काम कारबाहीमा नेपाल प्रहरी अब्बल भएको चर्चा गर्दै उनले सूचना व्यवस्थापन लगायतका कामतर्फ ध्यान दिई प्रहरीका सकारात्मक कामलाई प्रकाश पार्नुपर्ने विचार व्यक्त गरे ।
उक्त अवसरमा मधेस प्रदेश प्रहरी कार्यालय जनकपुरधामका प्रमुख प्रहरी नायव महानिरीक्षक मसाउद आलम खाँ, एसएसपि मनोज यादव लगायत ८ वटै जिल्लाका प्रहरी प्रमुख , एक नम्बर प्रदेशका प्रहरी प्रमुख डीआईजी सुदिप गिरि , वरिष्ठ प्रहरी अधिकृतहरु र १४ वटै जिल्लाका प्रहरी प्रमुखहरुको समेत उपस्थिति रहेको थियो ।
