काठमाडौं । प्रमुख प्रतिपक्ष दल नेकपा एमालेका अध्यक्ष केपी शर्मा ओलीले पैसाबाहेक अरू केही पनि नसोच्नेहरूको हातमा सरकार पुगेको आरोप लगाएका छन् । विश्व वातावरण दिवसको अवसरमा आज आइतवार ललितपुरको च्यासलमा रहेको तुलसीलाल स्मृति भवनमा आयोजित एक कार्यक्रममा सम्बोधन गर्दै ओलीले सरकारमा सहभागी मन्त्रीहरु पैसाको पछाडी लागेको बताएको हुन् ।
‘पैसाबाहेक अरू नसोच्नेहरूका हातमा सरकार पुगेको छ । यस्तो अवस्थामा केको वातावरण ? त्यो सबै कुरा टुङ्गियो । यी कुरा अहिलेका सरकारका मान्छेहरूलाई मलाई थाहा छैन । वातावरण विनाशको डिलमा पुग्न लागेको छ । यसबारेमा सरकारको केही रूचि छ कि छैन, ज्ञान छ कि छैन ?’
उनले वातावरणीय प्रश्नमा नेपालको हिमाल महत्त्वपूर्ण रहेको विषयमा आफूले सरकारमा रहँदा विश्वका नेताहरूसँग संवाद गरेको उल्लेख गर्दै त्यसको महत्त्व दर्शाउनका लागि अन्तर्राष्ट्रियस्तरको सगरमाथा संवाद कार्यक्रम सञ्चालन गर्ने निर्णय गरिएको पनि स्मरण गराए। तर त्यो सन् २०२० मा कोभिडका कारण अघि बढ्न नसकेको र त्यसपछि अघि बढाउन खोज्दा सरकारबाट हट्नुपरेको अध्यक्ष ओलीले स्ष्पष्ट पारे ।
