काठमाडौं । सरकारका प्रवक्ता एवं सञ्चार तथा सूचना प्रविधिमन्त्री ज्ञानेन्द्रबहादुर कार्कीले नेपाल प्रहरीको आईजीपीका लागि एआईजी धिरजप्रताप सिंह नै उपयुक्त देखिएकाले बढुवा गरिएको दाबी गरेका छन्।
आइतबार बसेको मन्त्रिपरिषद् बैठकले गरेको निर्णय सार्वजनिक गर्दै उनले यस्तो बताएका हुन्। ‘सबैभन्दा उपयुक्त देखिएका एआईजीलाई बढुवा गर्ने निर्णय भएको हो,’ निर्णय सार्वजनिक गर्दै उनले भने।
आजदेखि लागू हुने गरेर सरकारले एआईजी धिरजप्रताप सिंहलाई नेपाल प्रहरीको २९औं महानिरीक्षकमा बढुवा गरेको थियो।
नवनियुक्त आईजीपी सिंहले सोमबार नै दर्ज्यानी चिन्ह लगाउनुका साथै कार्यभार समेत सम्हालिसकेका छन्।
सरकारको यो निर्णयविरुद्ध एआईजी विश्वराज पोखरल सर्वोच्च अदालत पुगेका छन्। सर्वोच्चले उनको रिट दर्ता गर्दै बुधबारका लागि पेसी समेत तोकिसकेको छ।
