इनरुवा । आगामि बैशाख ३० गतेका लागि तोकिएको स्थानीय तहको निर्वाचनमा सुनसरीमा निर्धारण गरिएको १६६ मतदान केन्द्र मध्ये करिब एक चौथाई मतदान केन्द्र सुरक्षाको हिसावमा अतिसंवेदनशिलको सूचीमा परेका छन ।
जिल्ला भरीमा ४४ मतदान स्थल अति संवेदनशिल सूचीमा रहेको प्रमुख जिल्ला अधिकारी इन्द्रदेव यादवले जानकारी दिए । यद्यपि उनले निर्वाचन आफैमा संवेदनशिल विषय भएकोले सुरक्षा निकायले १६६ वटै निर्वाचन केन्द्रहरुलाई अति संवेदनशिलको सूचीमा राखेर तयारी गरिएको बताए ।
अति संवेदनशिल सूचीमा पर्ने अधिकांश मतदान स्थल भने भारतीय सिमावर्ती क्षेत्र नजिक पर्ने स्थानीय तह भित्रका रहेका छन ।
जसमध्ये सबै भन्दा बढी भोक्राहा नरसिंह गाउँपालिकाको १० मतदान स्थल अति संवेदनशिल मानिएका छन । कोशी र हरिनगर गाउँपालिकामा ९–९ वटा सो सूचीमा परेका छन ।
यस्तै देवानगञ्ज गाउँपालिकामा ७, इनरुवाको ४, दुहवीको ३, गढी र धरानको १–१ वटा मतदान स्थल अति संवेदनशिल मानिएको छ । उक्त सूचीमा इटहरी, बराहक्षेत्र, रामधुनी र बर्जु भने समावेश छैन ।
यता संवेदनशिल मतदान स्थलमा सबैभन्दा बढी इटहरी उपमहानगरभित्रका मतदान स्थल रहेका छन । इटहरीको १७, इनरुवाको ६, गढीको ८, दुहवीको ५, धरानको १३, बराहक्षेत्रको १२, बर्जुको १० र रामधुनीको ९ गरी कुल ८० मतदान स्थललाई संवेदनशिल मानिएको सुनसरी प्रशासनले जनाएको छ ।
निर्वाचन तयारी र संचार माध्यम सम्बन्धि आचारसंहिता विषयक अन्र्तकृयात्मक कार्यक्रमका क्रममा प्रशासनले उपलब्ध गराएको जानकारीअनुसार कुल १ सय ६६ मतदान स्थल मध्ये जिल्ला भित्रका ४२ मतदान स्थल सामान्य छन ।
२० वटा वडा रहेको इटहरी उपमहानगरपालिकामा २५ मतदान स्थल तोकिदा मतदान केन्द्रको संख्या १ सय ११ रहेको छ । इनरुवा नगरपालिको १० वडामा गरी १९ मतदान स्थल र ४७ मतदान केन्द्र रहेको छ ।
यसैगरी ८ वटा वडा रहेको कोशी गाउँपालिकामा ९ मतदान स्थल र २९ मतदान केन्द्र तोकिएको छ । कोशीका सबै मतदान स्थल अति संवेदन मानिएका छन । गढी गाउँपालिकाको ६ वडामा गरी ९ मतदान स्थल तोकिएको छ । जहाँ २७ मतदान केन्द्र रहेको छ ।
त्यस्तै १२ वटा वडा रहेको दुहवी नगरपालिकामा ४२ मतदान केन्द्र रहेको छ । देवानगञ्ज गाउँपालिकाको ७ वडाका सबै ७ वटै मतदान स्थल अति संवेदनशिल मानिएको छ । जहाँ २६ वटा मतदान केन्द्र रहेको छ ।
२० वटा वडा रहेको धरान उपमहानगरपालिकामा कुल २८ मतदान स्थल रहेको छ । धरानको कुल मतदान केन्द्र संख्या १ सय ७ रहेको छ । बराहक्षेत्र नगरपालिकाको ११ वडामा १६ मतदान स्थल तोकिएको छ । सो पालिकामा ६७ मतदान केन्द्र निर्धारण गरिएको छ ।
यता बर्जु गाउँपालिको ६ वटा वडामा १० वटा मतदान स्थल राखिएको छ । बर्जुमा २५ मतदान केन्द्र रहेको छ । ८ वटा वडा रहेको भोक्राहा नरसिंह गाउँपालिकामा १० मतदान स्थल तोकिएको छ । २८ मतदान केन्द्र रहेको भोक्राहाका सबै मतदान स्थललाई अति संवेदनशिल मानिएको छ ।
यसैगरी सुनसरीको रामधुनी नगरपालिकाको ९ वटा वडामा जम्मा १२ वटा मतदान स्थल कायम गरिएको छ । रामधुनीमा ४४ मतदान केन्द्र रहेको छ ।
त्यसैगरी ७ वटा वडा रहेको हरिनगर गाउँपालिकामा ९ मतदान स्थल रहेको छ । २८ वटा मतदान केन्द्र निर्धारण गरिएको हरिनगरको सबै ९ वटै मतदान स्थललाई अति संवेदनशिल मानिएको छ ।
१ सय २४ वटा वडा रहेको सुनसरीको स्थानीय तह तर्फ कुल १ सय ६६ मतदान स्थल तोकिएको छ । जसमा ४४ अति संवेदनशिल, ८० संवेदनशिल, ४२ सामान्य छन । जम्मा मतदान केन्द्रको संख्या भने सुनसरीमा ५ सय ८१ रहेको छ ।
बैशाख ३० गते हुन लागेको स्थानीय तह निर्वाचनमा मत खसाल्न योग्य नेपाली नागरिकको संख्या ५ लाख ३४ हजार ७ सय ६५ रहेको छ । जसमा महिलाको संख्या २ लाख ६५ हजार ६ सय १७ छ भने पुरुष मतदाताको संख्या २ लाख ६९ हजार १ सय ४६ रहेको छ । तेस्रो लिङ्गी मतदाता भने जम्मा २ जना रहेका छन ।
सुनसरीमा सबैभन्दा बढी मतदाता इटहरीमा रहेका छन । दोस्रो मतदाता बढी भएको स्थानीय तहमा धरान उपमहानगरपालिका रहेको छ । सुनसरीको पालिका मध्ये बर्जु गाउँपालिकामा सबै भन्दा कम मतदाता रहेका छन ।
निर्वाचन मिति नजिकिएसँगै जिल्लामा निर्वाचन केन्द्रित कार्यक्रमलाई अघि बढाइएको सुनसरी प्रशासनले जनाएको छ ।
प्रमुख जिल्ला अधिकारी इन्द्रदेव यादवका अनुसार जिल्लामा निर्वाचन लक्षित सुरक्षा रणनीति तयार गरिसकिएको छ । निर्वाचन तालिका अनुसारका कार्यक्रम अघि बढ्ने भएकाले सोही अनुसारको काम कार्वाहीको प्रकृयालाई प्रशासनले अघि बढाउँदै लैजाने प्रजिअ यादवले जानकारी दिए ।
