काठमाडौं । नेकपा एमालेका अध्यक्ष केपी शर्मा ओलीले नेपाल राष्ट्र बैंकका गभर्नर महाप्रसाद अधिकारीमाथि सरकारले गैरकानूनी हिसावले कारबाही गरेको बताएका छन्।प्रमुख प्रतिपक्षी दलका नेतासमेत रहेका अध्यक्ष ओलीले अर्थमन्त्री जनार्दन शर्माको दवावमा प्रधानमन्त्री शेरबहादुर देउवाले एकपछि अर्को गलत निर्णय गरेको आरोप लगाएका हुन्।
‘अराजक अर्थमन्त्रीको दवावमा भागबण्डाको ‘टेको’मा उभिएका प्रधानमन्त्री स्वयं पनि एकपछि अर्को गलत निर्णय लिइरहेका छन्। सबैभन्दा पछिल्लो निर्णयको रुपमा गभर्नरमाथि गैरकानूनी कारबाही रहेको छ,’ नयाँ वर्षको शुभकामना सन्देशमा अध्यक्ष ओलीले उल्लेख गरेका छन्।बिग्रँदो अर्थतन्त्रबारे प्रतिपक्षी दल र विज्ञहरूले गरेको खबरदारीलाई पनि सरकारले मनन नगरेको अध्यक्ष ओलीले बताए।‘सेटिङ्–सिद्धान्त’मा विश्वास गर्ने गठबन्धन सरकार विज्ञहरुको सुझाव र प्रतिपक्षी दलको खबरदारीलाई मनन गर्नुको साटो प्रतिवादमा उत्रिएको छ। तथ्याङ्कलाई तोडमोड गरी अर्थतन्त्र “दुरुस्त छ” भन्ने झुठा सूचना प्रवाह गरिरहेको छ,’ ओलीले भने।
आफूहरूको सरकारले छाडेको अर्थतन्त्र अहिले ओरालो लागे पनि गठबन्धन दलहरूले त्यसमा ध्यान नदिई आफ्नै स्वार्थसिद्धिमा केन्द्रित रहेको आरोप अध्यक्ष ओलीको छ।देशमा आयात अनियन्त्रित ढंगले बढेको, बाह्य कारोबार भुक्तानी असन्तुलित भएको र विदेशी मुद्रा सन्चितिमा पहिरो गएको ओलीको भनाइ छ।
‘अर्थप्रणाली गलत र अदृष्य तत्वको हातमा पुगेको छ। गठबन्धन सरकार भूमाफिया, काला व्यापारी र तस्करहरुको चंगुल र कमिसनतन्त्रको जालोमा फसेको छ। सरकारकै संरक्षणमा हुण्डी फस्टाएको छ,’ ओलीले भनेका छन्, ‘सरकारले साख गुमाएको छ। विकास साझेदारको विश्वास गुम्दैछ। सरकारमाथि व्यवसायिक क्षेत्रको विश्वास गुमेको छ। निजी क्षेत्र यो सरकारवाट निराश छ।’
साथै उनले नयाँ वर्षको अवसरमा स्वदेश तथा विदेशमा रहेका नेपालीहरूमा सुस्वास्थ्य, सुख, शान्ति, समृद्धि र सफलताको शुभकामना पनि दिएका छन्। उनले गत वर्ष राजनीतिक स्थिरताको दृष्टिकोणबाट सुखद नरहेको पनि बताए।
‘केही अवाञ्छित शक्तिका प्रतिगामी उद्देश्य र केही राजनीतिक व्यक्तिको जङ्गली आकाङ्क्षा, कुण्ठा र इर्श्याका कारण केही वर्षदेखि शुरू भएको हाम्रो विकास र समृद्धि तर्फको यात्रामा गम्भीर अवरोध उत्पन्न हुन पुग्यो,’ उनले भनेका छन्, ‘ विसंगति, वेथिति र अस्थिरताका पुराना दुषित खेलको फेरि पुनरावृत्ति भएको छ।’
