काठमाडौं । सशस्त्र प्रहरी बल (एपीएफ)को निमित्त महानिरीक्षक जिम्मेवारी पुष्पराम केसीले पाएका छन् । महानिरीक्षक शैलेन्द्र खनाल ४ वर्षे पदावधिका कारण चैत २९ गतेबाट अवकास पाउने भएपछि उनले वरियतामा अगाडि रहेका अतिरिक्त महानिरीक्षक (एआइजी) केसीलाई निमित्त प्रमुखको जिम्मेवारी दिएर संगठनबाट बिदा लिएका हुन् ।
सेवा अवधिका हिसावले खनालको आगामी वैशाख १८ सम्म कार्यकाल थियो । तर आइजीपीको ४ वर्षे सेवा अवधिका कारण त्यसअघि नै उनी अवकासमा गएका हुन् ।
उनको अवकासपछि सशस्त्रमा आगामी आइजीपी को हुने भन्नेबारे सरकारले निर्णय नलिएका कारण वरियतामा अगाडि रहेका केसीलाई निमित्त प्रमुखको जिम्मेवारी हस्तान्तरण गरेर खनाल संगठनबाट बाहिरिएका हुन् । केसीसँगै तीन साताका लागि संगठन प्रमुख हुन अर्का एआइजी रामशरण पौडेल पनि दावेदारका रुपमा छन् ।
तर सरकारले निर्णय गरिनसकेका कारण वरियतामा अगाडि रहेका एआइजीलाई निमित्त दिनुपर्ने बाध्यकारी व्यवस्था भएर केसीले जिम्मेवारी पाएका हुन् । केसीको पनि सशस्त्रमा अब वैशाख १८ सम्म मात्रै कार्यकाल रहने छ ।
आइजीपी खनाल र निमित्त आइजीपी केसी एउटै ब्याजका अधिकृत हुन् । दुवैजना २०४९ वैशाख १८ मा नेपाल प्रहरीको निरीक्षकबाट सेवा प्रवेश गरेका अधिकृत हुन् । दुवैजनाले सशस्त्र प्रहरी स्थापनासँगै २०५८ मा सेवा स्थानान्तरण गरेका थिए ।
एआइजी केसीले जिम्मेवारी सम्हाल्नुअघि सोमबार सशस्त्र प्रहरी मूख्यालयमा खनालको बिदाइ कार्यक्रम राखिएको थियो ।
सशस्त्र प्रहरी बल नेपाल प्रधान कार्यालय हल्चोक स्वयम्भूमा सोमबार आयोजित विशेष समारोहका बीच उनलाई सशस्त्र प्रहरी अतिरिक्त महानिरीक्षकद्वय पुष्पराम केसी र रामशरण पौडेलले फूलमालाका साथ मायाको चिनो प्रदान गरी बिदाइ गरेका थिए ।
सशस्त्र प्रहरी परिवार महिला सङ्घकी अध्यक्ष श्रीमती सरिता कँणेल खनाललाई सो सङ्घकी उपाध्यक्ष ज्योति केसीले फूलमालासहित बिदाइ गरिन् ।
महानिरीक्षक खनालले साङ्गठनिक विकासमा पु¥याएको योगदानको उच्च कदर गर्दै सशस्त्र प्रहरी अतिरिक्त महानिरीक्षकद्वय केसी र पौडेललाई प्रशंसापत्र तथा मायाको चिनो प्रदान गरे ।
महानिरीक्षक खनालले राज्यप्रदत्त जिम्मेवारी निर्वाहको क्रममा आफ्नो प्राणको समेत आहुति दिने सङ्गठनका संस्थापक सशस्त्र प्रहरी महानिरीक्षक स्व कृष्णमोहन श्रेष्ठलगायत सम्पूर्ण अमर सशस्त्र प्रहरीको योगदानको स्मरण गर्दैै कर्तव्य पालनाका सिलसिलामा घाइते भई अङ्गभङ्ग भएका राष्ट्रसेवकहरूको समेत शीघ्र स्वास्थ्यलाभको कामना गरे ।
उनले सङ्गठन आजको यस स्थानमा आइपुग्नुमा सङ्गठनका पूर्वज नेतृत्व, अवकाशप्राप्त सशस्त्र प्रहरी कर्मचारीले पु¥याएको योगदानको स्मरण गरे । महानिरीक्षक खनालले सशस्त्र प्रहरी कर्मचारी उत्तरी सिमानाको हिमाली क्षेत्रको कठ्याङ्ग्रिने जाडोदेखि दक्षिणी तराईको हावाहुरी तथा प्रचण्ड गर्मी रहेका ठाउँमा व्यक्तिगत स्वार्थलाई थाती राखी अहोरात्र खटिई आम नागरिकको सुरक्षामा खटिएको जानकारी दिए ।
उनले सीमा अपराध नियन्त्रण, आपत्विपत् पीडित नागरिकको उद्वार तथा चोरी निकासी तथा पैठारी नियन्त्रणमा खटिई प्रदर्शन गरेको उच्च व्यावसायिकता र उत्कृष्ट कार्यसम्पादन तथा कोभिड–१९ महामारी नियन्त्रण तथा सङ्क्रमितको उपचारमा नेपाल एपिएफ अस्पतालमार्फत प्रदर्शन गरेको सेवा था समर्पणभावको समेत सरकार तथा विभिन्न निकायबाट प्रशंसा भइरहेको उल्लेख गरे ।
समारोहमा सम्बोधनका क्रममा सशस्त्र प्रहरी अतिरिक्त महानिरीक्षक केसीले सशस्त्र प्रहरी महानिरीक्षक खनालले आफ्नो कार्यकाल सफलतापूर्वक सम्पन्न गरेकोमा बधाई दिँदै अवकाशपछिको जीवन सुखमय बितोस् भन्ने शुभेच्छा प्रकट गरे ।
४ वर्षको कार्यकालमा खनालले चीन र भारततर्फको सीमा क्षेत्रमा सशस्त्रको उपस्थिति बढाएका थिए । उनले आफ्नो कार्यकाल सुरु गर्दा भारततर्फ ८७ बोर्डर आउटपोस्ट (बीओपी) र चीनतर्फ शून्य उपस्थिति रहेकोमा अहिले चीनतर्फ ७ र भारतीयतर्फ २ सय २० स्थानमा पुर्याएका छन् । सरकारले आगामी २ वर्षभित्र सीमा सुरक्षार्थ भारत र चीनतर्फ गरी ५ सय बोर्डर आउटपोस्ट पुर्याउने घोषणा गरिसकेको छ । यसैबीच सशस्त्रमा बिदाइ कार्यक्रमअघि गृहमन्त्री बालकृष्ण खाँणले आइजीपी खनाललाई गृह मन्त्रालयमा आयोजित कार्यक्रमकाबीच बिदाइ सम्मान गरेका थिए ।
