काठमाडौं । नेपाली काँग्रेसका नेता प्रकाशमान सिंहले कांग्रेसकै निति र अडानका कारण आजसम्म हरेक राजनीतिक आन्दोलन सफल भएको दावी गरेका छन् ।
‘घरघर जाऔं, कांग्रेस जिताऔं’ अभियानअन्तर्गत शनिबार काठमाडौंमा आयोजित कार्यक्रमलाई सम्बोधन गर्दै नेता सिंहले कम्युनिष्ट द्वेध चरित्रका रहेको आरोप लगाए ।
‘काँग्रेसले लिएको नीति र अडानकै कारण आजसम्म हरेक राजनीतिक आन्दोलन सफल भएको छ । पछिल्लो समय राजनीतिलाई कमाइखाने भाँडो बनाउनेहरूका कारण जनतामा निराशा छ,’ कार्यक्रममा बोल्दै नेता सिंहले भने, ‘नेपालका कम्युनिस्टहरूको द्वेध चरित्रका कारण मुलुकमा अस्थिरता निम्तिएको छ । कांग्रेस मात्रै स्पष्ट अडानवाला पार्टी हो ।
उनले सत्ता र शक्तिमा रहेका नेताहरुले मुलुकको हितलाई ध्यानमा राखेर काम नगरेकोले नागरिकमा निरासा र मुलुकमा समृद्धि नआएको जिकिर गरे ।
वर्तमान गठबन्धन परिस्थितिले निर्माण भएको बताउदै उनले यसको बिरोध नगर्न र वास्तविकता नबिर्सन अनुरोध गरे । उनले काँग्रेसको केन्द्रीय कार्यसमिति बैठकमा पनि कार्यकर्ता र सुभचिन्तकहरुको मनोविज्ञानलाई बुझेर उपयुक्त निर्णय लिन आग्रह गरेका थिए ।
नेपाली काँग्रेसले स्थानीय निर्वाचलाई लक्षित गरेर घरघर जाऔँ काँग्रेसलाई जिताऔँ भन्ने नाराका साथ स्थानीय क्षेत्रमा अभियान चलाइरहेको छ ।
