एजेन्सी । उत्तर कोरियाले नयाँ किसिमको अन्तरमहादेशीय ब्यालेस्टिक क्षेप्यास्त्र (आईसीबीएम) परीक्षण गरेको पुष्टि भएको छ । सन् २०१७ यता पहिलोपटक उत्तर कोरियाले लामो रेन्जको मिसाइल परीक्षण गरेको हो ।
यस परीक्षणबाट उत्तर कोरियाले अन्तर्राष्ट्रिय जगतमा ठूलो तनाव सिर्जना गर्ने सम्भावना रहेको अन्तर्राष्ट्रिय सञ्चारमाध्यमले जनाएका छन् ।
यतिमात्र नभएर उत्तर कोरियालका मिडियाले ‘ह्वासङ–१७’ नामको मिसाइल लन्चलाई ‘हलिउड फिल्म’को शैलीमा प्रस्तुत गराएको छ । जसमा हिरोको रूपमा ‘किम जोङ उन’ आफैँ देखा परेका छन् । यस भिडियोबारे अहिले सामाजिक सञ्जालभरि व्यापक चर्चा चलिरहेको छ ।
यसमा टलक्क टल्किएको छालाको ज्याकेट, जुत्ता अनि कालो एभिएटर चस्मा लगाएर किम मिसाइल परीक्षण गरिएको ठाउँमा ‘स्लोमोसन’मा हिँडिरहेका छन् ।
पछिल्लो समय उत्तर कोरियाले आफ्नो ‘डिजिटल इफेक्टस’मा सुधार ल्याउँदै राष्ट्रका कथा र विशेष समाचारहरू बताउन आधुनिक शैली अपनाउने प्रयास गरिरहेको देखिन्छ ।
यस्तोमा अनलाइन प्रयोगकर्ताहरूले यो भिडियोलाई ‘टप गन’ फिल्मसँग तुलना गरेका छन् भने कतिले चाहिँ उत्तर कोरियाली शैलीको ‘ग्याङनम स्टाइल’ पनि भनिरहेका छन् । किमको पहिरन र हाउबाउ हेरेर धेरैले यसलाई ‘प्योङयोङ स्टाइल’ अनि ‘टप किम जोङ उन’ भन्ने जस्ता हाँस्यास्पद नाम दिइरहेका छन् ।
यहाँसम्मकि यो भिडियोको ‘साउन्ड ट्रयाक’समेत फिल्मी शैलीमा राखिएको छ । मिसाइल सफलतापूर्वक लन्च भइसकेपछि किम हाँस्दै खुसी हुँदै आफ्ना सेनाहरूसँग नौलो ‘स्टाइल’ मा विस्तारै हिँडिरहेका छन् ।
यो नयाँ परीक्षणलाई उत्तर कोरियाली मिडियाले अमेरिकाको जुनसुकै घातक सैन्य कदमविरुद्ध लड्न सक्षम आणविक शक्ति भनेर व्याख्या गरेको छ ।
कहाँसम्म पुग्न सक्छ यो नयाँ मिसाइल ?
कोरियन सेन्ट्रल न्युज एजेन्सीको रिपोर्टअनुसार यो मिसाइल अधिकतम ६ हजार किलोमिटरको उचाइ र १,०९० किलोमिटरको दुरीसम्म पुग्न सक्छ । परीक्षणका क्रममा यो ६८ मिनेटसम्म उडेको थियो र पछि गएर योजनाबद्ध रूपमा ठिक ठाउँमा अवतरण गरेको बताइएको छ । मिसाइल कोरिया र जापानबीच पानीमा खसेको थियो ।
यो भनेको उत्तर कोरियाको अहिलेसम्म रेकर्ड भएका मध्येमै सबैभन्दा उचाइमा र टाढा पुग्न सफल मिसाइल हो ।
परीक्षण गरिएको हुनाले पनि अन्य देशको आकासमाथिबाट उड्नबाट जोगाउन कठिन टार्जेक्टरी राखिएको रिपोर्टमा उल्लेख गरिएको छ ।
के यसले ‘न्युक्लियर वारहेड’ बोक्न सक्छ ?
ह्वासङ–१७ थुप्रै न्युक्लियर वारहेड अर्थात आणविक हतियार बोक्न सक्नेगरी ठूलो आकारको रहेको बताइएको छ । त्यसैले वारहेडसँगै यसले अन्य हतियारहरू पनि बोक्न सक्नेछ । यो भनेको उत्तर कोरियाली पक्षको तर्फबाट ठूलो सुधार हो । तर सुधारको अर्थ यससँग यी सबै कुरा गर्न सक्ने पूर्ण क्षमता छ भनेर अहिले नै भन्न नसकिने विज्ञहरू बताउँछन् ।
उत्तर कोरियाको आगामी मिसाइल कार्यक्रम कस्तो छ ?
किम जोङ उनले उत्तर कोरियालाई विश्वसनीय परमाणु शक्ति बनाउन थुप्रै महत्वाकांक्षी योजनाहरू सार्वजनिक गर्दै आएका छन् । यसमा उनको मुख्य लक्ष्य भनेको अमेरिकाबाट हुनसक्ने कुनैपनि किसिमको हमलाबाट आफूलाई बचाउन सक्नु र प्रतिरोध गर्न पनि सक्षम बन्नु रहेको छ । विश्वविद्हरूका अनुसार किमले आफ्ना यी लक्ष्यहरू पूरा नगरेसम्म रोकिने संकेत देखाउने छैनन् ।
यसअघि किमले आफ्ना मिसाइलहरूको रेन्ज १५ हजार किलोमिटरसम्मले बढाउन चाहेको र त्यसको सटिकतामा पनि अधिक सुधार ल्याउने योजनाको घोषणा गरेको थियो ।
