काठमाडौं । आगामी वैशाख ३० गतेका लागि तय भएको स्थानीय तह निर्वाचनमा चुनाव चिह्न हरियो रङको प्रयोग हुने जानकारी निर्वाचन आयोगले दिएको थियो ।
सोमबार निर्वाचन आयोगले गरेको पत्रकार सम्मेलनमा आगामी निर्वाचनमा मतपत्रमा निर्वाचन चिह्न हरियो रङको हुने बताएको थियो ।
तर, प्रमुख प्रतिपक्षी दल नेकपा एमालेले यसको विरोध गरेको छ । मंगलबार एमाले अध्यक्ष केपी शर्मा ओलीले कुनै दल विशेषलाई फाइदा पुग्ने गरि आयोगले निर्णय गरेको आरोप लगाए । कमजोर आँखा हुनेहरूले रुखै रुख देखुन् भनेर हरियो राख्न लागेको ओलीको टिप्पणी थियो ।
‘के हिसाबले हो यो चिह्न राख्ने ? अथवा कसैको हरियो देखिने चिह्न छ कसैको, त्यसकारण राख्ने? केका लागि राख्ने? सबैतिर जनताले आँखा नदेख्ने, कमजोर आँखा हुनेहरूले रुखै रुख देखुन् भनेर हरियो राख्ने हो ? किन हरियो राख्ने ?’ ओलीको प्रश्न थियो ।
उनले काँग्रेसको चुनाव चिह्न रुख हरियो हुने भएकाले त्यसलाई फोकस गर्न यस्तो निर्णय गरिएको दाबी गरे । मतपत्रमा हुने चिह्नको रङले मत परिणाममा प्रभाव पर्ने संकेत ओलीको थियो ।
तर, निर्वाचन आयोगले भने यसअघिका निर्वाचनमा देखिएको समस्या समाधानका लागि यस्तो निर्णय गरिएको दाबी गरेको छ । पहिला मतपत्र नीलो रातो हुँदा र स्वस्तिक पनि नीलो हुँदा गणनामा समस्या भएको आयोगको दाबी छ । पहिलेको पत्र नीलो रातो हुँदा स्वस्तिक छाप पनि नीलो हुने भएकाले गणना गर्दा स्पष्ट नभएपछि चिह्न हरियो बनाइएको आयोगले जनाएको छ ।
निर्वाचन आयोगका प्रवक्ता शालिग्राम शर्मा पौडेलका अनुसार सबै निलो हुँदा गणनामा स्पष्टरुपमा नदेखिएकोले यसलाई प्रस्ट देखिने बनाउन खोजिएको बताए ।
‘चिह्न, धर्का र छापसमेत निलो हुँदा स्पष्ट रूपमा देख्न सकिएन’ उनले भने, ‘ यसलाई चहकिलो बनाउन खोजिएको हो ।’
तर, एमाले अध्यक्ष ओलीले भने मतपत्रमा चिह्नको रङ फेर्ने त्रुटि आयोगले सच्याउनु पर्ने बताए ।
यदि हरियो राख्ने निर्णय गरेको हो भने, होइन भने सञ्चार माध्यमले आफ्नो त्रुटि सच्याउनुपर्छ । यदि निर्वाचन आयोगले नै त्यो गरेको हो भने निर्वाचन आयोगले त्यस्तो त्रुटि सच्याउनुपर्छ। हरियो सरियो हुँदैन’ ओलीले भने ।
निर्वाचन आयोगले सोमबार विज्ञप्ति निकालेर हरियो रङको जानकारी दिएको थियो। ‘स्थानीय तहको निर्वाचनको लागि आवश्यक मतपत्र छपाइ गर्दा मतपत्रमा छपाइ हुने चिह्न, विवरण तथा सुरक्षण चिह्नहरू हरियो एसकेड्यास-३०८१ स्पेसक्ट्रम ब्राइट ग्रिन मसीले छपाइ गर्ने गरी आयोगबाट निर्णय भएको छ’, आयोगको विज्ञप्तिमा भनिएको छ । २०७९ वैशाख ३० गते हुने स्थानीय तहको निर्वाचनका लागि निर्वाचन आयोगले धमाधम तयारी गरिरहेको छ ।
फेसबुकबाट तपाईको प्रतिक्रिया !