विराटनगर । नेपाली कांग्रेसका नेता डा.शेखर कोइरालाले नेपाली कांग्रेस र कम्युनिष्टको विचारमा धेरै भिन्नता रहेकाले स्थानीय, प्रदेश र संसदको निर्वाचन नेपाली काग्रेस एक्लैले लड्ने बताएका छन् ।
नेपाली कांग्रेस विराटनगर महानगर समितिले विराटनगरमा आयोजना गरेको ‘वर्तमान परिस्थितिमा नेपाली कांग्रेसको भूमिका विषयक विचार गोष्ठीलाई सम्बोधन गर्दै नेता कोइरालाले वर्तमान गठबन्धन आगामी निर्वाचनसम्म मात्र हुने बताएका हुन् ।
उनले वर्तमान गठबन्धन बाध्यात्मक परिस्थितिमा बनेकोले गठबन्धनले सँधै निरन्तरता नपाउने धारणा राखे । सो कार्यक्रमलाई सम्बोधन गर्दै नेपाली कांग्रेसका उपसभापति धनराज गुरुङले गठबन्धनका केही दलहरुले नेपाली कांग्रेसको सहकार्य चाहेपनि आगामी निर्वाचनमा सहकार्य नहुने स्पष्ट पारे ।
सो कार्यक्रममा नेपाली कांग्रेसका महामन्त्री गगन थापाले बैशाख ३० गतेको स्थानीय तहको निर्वाचन कुनै पनि हालतमा नसर्ने भएकाले निर्वाचनको तयारीमा जुट्न कार्यकर्ताहरुलाई निर्देशन दिए । उनले नेपाली कांग्रेसले आगामी निर्वाचनमा महुमत ल्याएर सरकार बनाउने बताए ।
सो कार्यक्रमलाई नेपाली कांग्रेसका नेताहरु डा. मिनेन्द्र रिजाल, डा. चन्द्र भण्डारीलगायतले सम्बोधन गरेका थिए ।
