एजेन्सी । युक्रेनमा सन् २०१५ मा एउटा टेलिभिजन सिरिज बन्यो । जसको नाम थियो ”सर्भेन्ट अफ द पिपल” । व्यङ्ग्यात्मक राजनीतिक टेलिभिजन सिरिज भोल्डोमिर जेलेन्स्कीले निर्माण गरेका थिए । जेलेन्स्की अहिले युक्रेनका राष्ट्रपति छन् ।
उक्त सिरियलमा जेलेन्स्की विद्यालयका इतिहासका शिक्षक हुन्छन् । सरकारको भ्रष्टाचारविरुद्ध शिक्षकको एउटा फुटेज उनका विद्यार्थीले बनाउँछन् । उक्त भिडियो भाइरल हुन्छ । जसका कारण ती शिक्षक राष्ट्रपति जित्न सक्छन् ।
शिक्षकबाट राष्ट्रपति बनेर देशलाई कायापलट गर्न थालेको टीभी सिरिजहरु लगातार बनाउँछन् जेलेन्स्कीले । २०१६, २०१७ र २०१८ मा पनि उक्त सिरिज बन्छ ।
‘सर्भेन्ट अफ द पिपल’ टेलिभिजन सिरिज लोकप्रीय हुन्छ । यही लोकप्रीयताबाट उत्साही भएर जेलेन्स्कीले सन् २०१८ मा पार्टी दर्ता गर्छन् । त्यसको एक वर्षपछि जेलेन्स्की फिल्मी शैलीमा युक्रेनका राष्ट्रपति निर्वाचित हुन्छन् ।
टीभी सिरियलमा राष्ट्रपति बनेका जेलेन्स्की आश्चर्यजनक ढंगले लोकप्रीयताको चुलीमा पुगी निर्वाचित छन् । धेरैका लागि यो एउटा चमत्कार नै थियो । टीभि सिरिजले उनलाई राष्ट्रपति बनाउन सक्यो ।
जेलेन्सकीले राजनीतिक महत्वाकांक्षाले नै योजनावद्ध तरिकाले टीभी सिरिज बनाएको पछि खुल्यो । वास्तवमा उनी राष्ट्रपति बन्न चाहन्थे र त्यसका लागि माहोल तयार गर्दै थिए । यसका लागि आफ्नो अभिनयकलालाई भरपूर प्रयोग गरे । हाँस्यकलालाई जनताको मत जित्न उपयोग गरे ।
२०१९ मा जेलेन्स्की राष्ट्रपति निर्वाचित भए । सिरियलका राष्ट्रपति यथार्थमा राष्ट्रपति बन्न सके ।
जेलेन्सकी राष्ट्रपति बनेपछि रुससँगको सम्बन्धमा झन् तनाव बढ्न थाल्यो । रुसले युक्रेनमाथि दबाब बढाउन थाल्यो । जेलेन्स्की भने फिल्मी शैलीमा नायक बन्नतर्फ लागे । लोकप्रीय बन्ने गरी काम गर्न थाले । राष्ट्रवादको मुद्दालाई जोडतोडले उठाउन थाले ।
युक्रेनलाई नाटोमा जोड्न खोजे । त्यसलाई रुसले रुचाएन । दबाब बढाइरह्यो । अन्तमा रुसले युक्रेनलाई घेर्न थाल्यो । सीमामा सैनिक खटायो । जेलेन्सकी झन् राष्ट्रवादी अभिव्यक्ति दिन थाले ।
सन् २०२२ मा रुसले युक्रेनमाथि हमला गर्नुअघि जेलेन्स्कीले फिल्मी शैलीमै युक्रेनको शक्ति र सामथ्र्यबारे जनतामाझ सन्देश छरिरहेका थिए । उनको बोलीबाट युक्रेनीहरु विश्वस्त भए ।
रुसले युक्रेनलाई सुरुमा विभाजित गरायो । दुई वटा राज्यको स्वतन्त्रतालाई स्वीकार गर्यो । त्यसपछि युक्रेनमा हमला गर्न थाल्यो । जेलेन्स्कीले अमेरिकालगायत यूरोपेली युनीयनले आफ्नो देशलाई युद्धमा प्रत्यक्ष साथ दिने ठाने । तर, कोही पनि प्रत्यक्ष युद्धमा आएनन् ।
युक्रेनका धेरै शहरहरुले ठूलो क्षति भोग्दै गए । हजारौंको ज्यान गयो । रुसविरुद्ध अमेरिका, बेलायतलगायतका यूरोपका देशहरु कोही पनि युद्धमा सहभागी हुन तयार भएनन् । अन्तमा जेलेन्स्कीले अमेरिकासहित नाटोलाई युक्रेनविरुद्ध हमलामा ग्रीन सिग्नल दिएको भन्दै कठोर टिप्पणी गरे ।
युक्रेन जलिरह्यो । टीभि सिरिजका राष्ट्रपति जेलेन्स्की साँच्चैको राष्ट्रपति बने । तर, युक्रेनलाई उनले फिल्मी शैलीमा रुसी हमलाबाट जोगाउन सकिरहेका छैनन् ।
उता रुसी राष्ट्रपति भ्लादिमिर पुटिन जेलेन्स्कीलाई व्यङ्ग्य गर्दै युद्ध हलिउडको फिल्ममा जस्तो नहुने भनिरहेका छन् ।
