काठमाडौं । प्रतिनिधि सभाले गत आइतबार अमेरिकी सहयोग परियोजना मिलिनियम च्यालेन्ज कर्पोरेशन (एमसीसी) सम्झौता अनुमोदन गरेसँगै सत्तारुढ नेकपा माओवादी केन्द्रमा विवाद देखिएको छ । एमसीसी सम्झौताको संसदीय अनुमोदनपछि माओवादी केन्द्रमा नारायणकाजी श्रेष्ठ पक्षधर नेताहरूमा असन्तुष्टि चुलिएको छ ।
अध्यक्ष पुष्पकमल दाहाल पक्ष एकलौटी रूपमा अघि बढेको र आफूहरूको कुरा नसुनेको भन्दै उनीहरूले गुनासो गरेका छन् । ब्याख्यात्मक घोषणासहित पाँच दलीय सत्तारुढ दल अमेरिकी सहायता परियोजना मिलेनियम च्यालेन्ज कर्पाेरेशन (एमसीसी) सम्झौता पारित गर्न अन्ततः सहमत भए ।
गत आइतबार प्रतिनिधि सभाले अमेरिको सहयोग सम्झौता मिलेनियम च्यालेन्ज कर्पोरेशन (एमसीसी)लाई व्याख्यात्मक घोषणासहित पारित गरेपछि एमसीसीविरुद्ध विभिन्न ६ वामपार्टी र दुई मोर्चाका साथ संघर्षमा उत्रिएको नेपाल कम्युनिष्ट पार्टी (नेकपा)का महासचिव नेत्रविक्रम चन्द ‘विप्लव’ ले राजनीतिक सक्रियता बढाएका छन् ।
एमसीसीलाई संसदले अनुमोदन गरेसँगै विप्लव लगायतले विरोधी धारको नेतृत्व गरिरहेका छन् ।
एमसीसी राष्ट्रघाती रहेको भन्दै संसदमा टेबल गर्नुअघिबाटै आन्दोनमा उत्रिएको वाम पार्टीहरुको समूहले आन्दोलनलाई प्रभावकारी बनाउन पहल थालेको छ । सत्तारुढ दलहरुबीच लामो रस्साकस्सीका बीच गठबन्धन जोगाउने गरि व्याख्यात्मक घोषणाको साहरा लिइएको भए पनि नेकपा माओवादी केन्द्र र एकीकृत समाजवादीमा असन्तुष्टि बढेको छ । माओवादी केन्द्रमा नेता नारायणकाजी श्रेष्ठ पक्षले र एकीकृत समाजवादीमा सम्मानित नेता झलनाथ खनालले बिरोध गरिरहेका छन् ।
त्यस्तै एमसीसी पारित गर्ने समयमा बेल घेरेर बसेको नेकपा एमालेका नेता भीम रावल पनि एमसीसीको विपक्षमा उभिएका छन । यस्तोमा नेकपाका महासचिव विप्लवले आफ्नो सक्रियता बढाएका छन् ।
उनले नेकपा माओवादी केन्द्रका नेता नारायणकाजी श्रेष्ठ, नेकपा एकीकृत समाजवादीका सम्मानित नेता झलनाथ खनाल र एमसीसी सम्झौताको संसदमा चर्को बिरोध गर्दै आएको नेपाल मजदुर किसान पार्टीका अध्यक्ष नारयणमान विजुक्छेसँग भेटवार्ता र छलफल गरेका छन् । विप्लवले एमसीसी बिरोधी नेताहरुलाई आफूहरुको समूहले आयोजना गर्न लागेको एमसीसीविरुद्धको सभामा सहभागी गराउन पहल गरिरहेको छ ।
नेताहरुसँगको भेटमा विप्लवले राजनीतिक सहकार्यको प्रस्ताव गरिरहेका छन् । वामपन्थी नेताहरुसँगको तीब्र भेटघाटमा लागेका विप्लवको खास उद्देश्य चाहिं वामनेताहरुलाई एउटै थलोमा जम्मा गर्ने र राष्ट्रवादीहरूकाे माेर्चा निर्माण गरेर शक्तिशाली बनाउने हो । अहिलेको भेट भने भोलि फागुन २० गते काठमाडौंमा हुने विप्लवको पार्टीले आयोजना गर्ने एमसीसी विरोधको सभामा निम्ता गर्नका लागि पनि हो ।
सहकार्यका लागि छलफल गर्नेदेखि सभामा सम्बोधन गर्नका लागि पनि उनीहरुलाई निम्ता गर्न विप्लव आफै पुगेर अनुराेध गरेकाे उनीनिकट नेताहरुले बताएका छन् । भोलि २० फागुनमा हुने सभामा विप्लवले एमसीसीको विरोध गर्ने अन्य पार्टीका नेताहरुलाई सम्बोधनका लागि बोलाएका छन् । एमालेका नेता भीम रावल, एकीकृत समाजवादीका झलना खनाल, नारायणकाज श्रेष्ठ, नारायणमान विजुक्छेदेखि मोहन बैद्यसम्मलाई निमन्त्रणा गरेका छन् ।
उक्त सभामा एमसीसीको विरोधमा आन्दोलनरत आहुती, ऋषि कट्टेललाई पनि निम्ता गरेका छन् । यो निम्तासँग सहकायको विषयमा छलफल अगाडि बढाउन खोजिएको ती नेताको भनाइ छ । माअोवादी केन्द्रबाट अलग हुन खोजेका श्रेष्ठलाई समेत लिएर नयाँ पार्टी बनाउने बारेमा पनि उनीहरुबीच छलफल हुन थालेको छ ।
अहिले नै पार्टी बन्ने अवस्था नभएर मोर्चाबन्दी सहकार्य गर्न सकिने भनेर विप्लवले प्रस्ताव गरेका छन् । त्यसमा अन्य नेताहरु पनि सहमत रहेको बताईन्छ । अहिले सहकार्य गरेर अगाडि जाने हो भने स्थानीय तहको निर्वाचनमा स्वतन्त्र उम्मेदवारी दिएर जान सकिनेबारेमा छलफल चलेको छ । एमसीसी विरोधी नेताहरु एकठाउँ उभिएर पार्टी बनाउँदा ठूलै जनमत एकीकृत गर्न सकिने उनीहरुको बुझाइ छ ।
