काठमाडौं । भन्सार छलेर ल्याएको रेड लेबल, एब्सोल्युट भोड्का र ब्ल्याक लेबल बेचेको आरोपमा पक्राउ परेका आरोपी लागु औषध मुद्दामा पनि फरार रहेको खुलासा भएको छ । दरबारमार्ग स्थित भारतीय ब्रान्डको कपडा सोरुम बिइङ ह्युमेनको संचालक मध्येका सन्तोष चन्द्र बाख्रेल लागु औषध ‘ट्रामाडोल’कारोबारी पनि रहेको खुलेको छ ।
लागु औषध ‘ट्रामाडोल’ कारोबार गरेको आरोपमा प्रहरीको लागु औषध नियन्त्रण ब्यूरोले उनलाई दुईपटक फरार सूचीमा राखेर औषधी व्यवस्था विभागमा मुद्दा दायर गरेको थियो ।गएको वर्ष १९ लाख ट्रामाडोल कारोबार र यसवर्ष २० हजार ट्रामाडोल कारोबारमा बाख्रेल फरार छन् । २० हजार ट्रामाडोल सहित ५ जनालाई पक्राउ गरेर व्यूरोले भर्खरै सरकारी वकिल मार्फत औषधी व्यवस्था विभागमा मुद्दा दायर गरेको छ ।
शनिवार १ करोड४९ लाख ६० हजार मुल्य बराबरको भन्सार छलीको मदिरा सहित महानगरीय अपराध महाशाखाले बाख्रेल सहित ४ जनालाई पक्राउ गरेको थियो । पक्राउ पर्नेमा ३९ वर्षीय सन्तोषचन्द्र बाख्रेल, ३० वर्षका सैलेश पन्त, २८ वर्षका रविन पाख्रिन र ४० वर्षका नारायण प्रसाद घिमिरे छन् । घिमिरे नेपाली सेनाका पूर्व हवल्दार हुन् ।
