विराटनगर । मोरङको धनपालथान गाउँपालिका–७ स्थित उखुबारीमा बिहीबार सुनसरीको धरान उपमहानगरपालिका–३ घर भएका राजेन्द्रकुमार श्रेष्ठको शव भेटियो । ४९ वर्षीय श्रेष्ठको शव खाल्डोमा पुरेको अवस्थामा प्रहरीले उत्खनन गरेको छ ।सो ठाउँमा बुधवार पनि पुरुषको शव उत्खनन गरिएको थियो ।
पहिलो शवको पहिचान अझै खुलेको छैन् । पहिलो शव निकालिएको ठाउँभन्दा करिब २५ मिटर पर फेला परेका राजेन्द्रकुमार श्रेष्ठ एक महिनादेखि परिवारको सम्पर्कमा थिएनन् ।भक्तपुरको लोकन्थलीमा परिवारसँग बस्ने श्रेष्ठ जग्गाको काम गर्थे ।
‘उहाँ एक महिनाअघि भक्तपुरबाट हिँडेको थाहा भएको छ’ मोरङका एसपी जनार्दन जिसीले भने–‘परिवारसँग एक महिना अघिदेखि सम्पर्क भएको देखिँदैन ।’भक्तपुरको लोकन्थलीमा बस्ने उनका परिवार ‘शव भेटिएको’ खबरले विक्षिप्त भएका छन् । परिवारका सदस्य मोरङमा पुगेका छन् तर, उनीहरुसँग सोधपुछ गर्ने अवस्था नभएको एसपी जिसीले बताए । उनले भने–‘परिवारका सदस्य बोल्न सक्ने अवस्थामा हुनुहुन्न ।’
राजेन्द्रकुमार श्रेष्ठ बेला–बेला हराइरहन्थे, ८–१० दिनमा घर जान्थे । ‘दुईचार दिन आउँदिन’ भनेर हिँड्ने बानी भएको हुनाले परिवारले पनि लामो समय सम्पर्क नहुँदा चासो गरेनन् । बुधवार भेटिएको शव पहिचान हुन नसकेको तर, पहिचान नजिक पुगेको एसपी जिसीको भनाइ छ । दुवैजनाको शव पोष्टमार्टमका लागि कोशी अस्पतालमा राखिएको छ ।
