बारा । बारामा एक ९ वर्षीया बालिकाको बलात्कारपछि निर्ममताप२र्वक हत्या गरेको आरोपमा प्रहरीले दम्पत्तीलाई पक्राउ गरेको छ । जिल्ला प्रहरी कार्यालय बाराले आइतबार बालिका रुपमालाकुमारी साहको बलात्कारपछि हत्यामा संलग्न रहेको आरोपमा सन्तोष साह कानु र उनकी श्रीमती शान्तिदेवीलाई पक्राउ गरेर सार्वजनिक गरेको हो । बारा प्रहरीका अनुसार मृतक बालिका २५ पुसदेखि हराइरहेकी थिइन ।
उनी बाख्रा चराउन गएको र फर्केर नआएको निवेदन प्रहरीमा परेको थियो । प्रहरीले खोजतलासगर्दा उनको शव २७ पुसमा बारा आदर्श कोतवाल गाउँपालिका–७ कोतवाली टोल जमुनी खोलामा फेला परेको थियो ।प्रहरीका डीएसपी राजेश थापाका अनुसार घटनास्थलको अवलोकन गर्दा नाबालिकाको घाँटी कसी टाउँको समेतमा प्रहार गरी हत्या गरेर फालेको अवस्थामा भेटिएको थियो । उनका अनुसार यसपछि कुकुर सहितको विशेषज्ञ प्रहरी टोली झिकाई घटनास्थलको सुक्ष्म अनुसन्धान सुरु भएको थियो ।
अनुसन्धानकाक्रममा मृतकसँगै बाख्रा चराई रहेका व्यक्तिहरूले मृतक खाने पानी लिन मृतक लाश फेला परेको स्थान नजिकै रहेको बिन्देश्वर साह कानुको कुखुरा फार्म तर्फ गएको र त्यसपछि नआएको बताए । अनुसन्धानमा घटनाका दिन कुखुरा फार्ममा संतोष साह कानु बाहेक अन्य व्यक्ति नरहेको पत्ता लागेपछि प्रहरीले उनीसँग सोधपुछ थालेको थियो ।
सोधपुछ गर्दा सन्तोषले बालिका पानी लिन आएको र फर्कनेक्रममा आफुले करणी गरि हत्या गरेको स्विकार गरेको प्रहरीले जनाएको छ । प्रहरीले उक्त अपराधमा प्रतिवादी शान्ति देवीले अपराध पुष्टी हुने दशीहरू लोप गर्ने प्रयास गरेको जनाएको छ । प्रहरीले दुबैलाई पक्राउ गरी ज्यान सम्बन्धी कसूरमा बारा जिल्ला अदालतबाट पहिलो पटक ५ दिन को म्याद थप गरी अनुसन्धान भइरहेको जनाएको छ ।
