काठमाडौं । महानगरीय ट्राफिक महाशाखाले आज देखि ट्राफिक नियम उल्लंघन गरेबापत चालकहरुले तिर्नुपर्ने जरिवाना रकम प्रभुपेको किअस्क मेसिनको प्रयोग गरी तिर्ने व्यवस्था मिलाएको छ । ट्राफिक महाशाखाले जरिवाना भुक्तानी गर्ने प्रविधिहरुलाई क्रमश परिस्कृत गर्दै आजदेखि मेसिनमा नगद प्रयोग गरी जरिवाना तिर्न सकिने सेवा सुरु गरेको हो ।
महाशाखाले सुरुवाती चरणमा ट्राफिक नियम उल्लंघनकर्ताले ग्लोबल आईएमई बैंकमा गई भौचरको आधारमा ट्राफिक जरिवाना तिर्ने गरेका थिए ।पछिल्लो समय प्रविधिमैत्री बनाउँदै विभिन्न ६४ वटा बैंकको मोबाइल बैंकिङ्, डिजिटल वालेटका १४ वटा जरिवाना भुक्तानी सेवा प्रदायक सँस्थाहरु र क्वीआर पेमेन्ट बाट समेत जरिवाना तिर्न सकिने प्रणाली संचालनमा छन् ।
आज एक कार्यक्रमका बीच ट्राफिक प्रहरी महाशाखाका प्रहरी बरिष्ठ उपरीक्षक उमेश राज जोशी र प्रभुपेका अध्यक्ष कुसुम लामाले संयुक्त रुपमा नगद पैसा हालेर ट्राफिक जरिवाना तिर्न सकिने प्रविधि ‘प्रभुपेको किअस्क मेसिन’ उद्घाटन गरेका हुन् ।
कार्यक्रममा बोल्दै एसएसपी जोशीले ट्राफिक सेवालाई थप प्रविधिमैत्री बनाउँदै आम सेवाग्राहीलाई ट्राफिक जरिवाना तिर्न सरल एव सहज होस भन्ने उद्देश्यले यो मेसिनको जडान गरेको बताएका हुन् । उनले किअस्क मेसिनमा सिधै नगद हालेर जरिवाना भुक्तानी गर्न सकिने बताएका छन् । उनले यसले बैंकमा गएर लामो समय लाइनमा बस्ने झन्झटबाट मुक्त हुने र समयको समेत वचत हुने धारणा पनि व्यक्त गरेका छन् । उनले थप ट्राफिक कार्यालयहरुमा सेवा बिस्तार गर्न समेत प्रभुपेद्वारा सहयोग हुने अपेक्षा व्यक्त गरेका छन् ।
प्रभुपेकी अध्यक्ष कुसुम लामाले ट्राफिक प्रहरी महाशाखासँग सहकार्य गरि किअस्क मेसिन जडान गरि सेवा बिस्तार गर्न पाउँदा खुशी व्यक्त गरेकी छन् । उनले यो मेसिनले बैंकिङ् कारोबार बन्द भएको समयमा समेत सेवा दिने हुनाले ट्राफिक जरिवाना तिर्ने सेवाग्राही बढि लाभान्वित हुने समेत बताएकी छन् ।हाल ट्राफिक महाशाखा सहित उपत्यकामा ३०९ स्थानमा प्रभुपेको किअस्क मेसिनबाट ट्राफिक जरिवाना तिर्न सकिने व्यवस्था मिलाएको उनले जानकारी दिएकी छन् ।
त्यस्तै, उनले थप सहकार्य गरी अन्य ट्राफिक प्रहरी कार्यालयहरुमा समेत जडान गर्दै जाने पनि जानकारी दिएकी छन् ।यस कार्यबाट कोरोना संक्रमणको समयमा ट्राफिक कार्यालय र बैंकमा हुने अनावश्यक भीडभाडमा कमी आउनेमा महाशाखा विश्वस्त रहेको छ । कोरोना संक्रमणको जोखिमलाई न्युनीकरण गर्न समेत यो मेसिनले महत्वपुर्ण भूमिका खेल्ने ट्राफिक प्रहरी महाशाखाका प्रबक्ता एवं एसपी संजीब शर्मा दासले बताएका छन् ।‘ट्राफिक जरिवाना तिर्न बिभिन्न प्रबिधिको बिस्तार गर्ने क्रममा मोबाईल बैंकिङ् वा अन्य अनलाईन प्रविधिको प्रयोग नगर्ने सेवाग्राहीलाई नगदै पैसा तिर्ने यो मेसिन अत्यन्त सहयोगी सिद्ध हुनेछ’ उनले भने ।
सर्वप्रथम प्रभुपेको किअस्क मेसिनमा रहेको ट्राफिक प्रहरीको लोगोमा क्लिक गर्ने र त्यसपछि स्क्रिनमा देखिने चिट नम्बर र आर्थिक बर्ष टाइप गरी नेक्स्ट बटन थिच्नुपर्दछ । त्यसपछि देखिने चिट नम्बर लगायतको सुचना चेक गरी नेक्स्ट बटनमा थिचेर तिर्नुपर्ने रकम मेसिनमा हालेर भुक्तानी गनुपर्ने महाशाखाले जनाएको छ । भुक्तानी सफल भए पश्चात प्रिन्ट भएको रसिद सहित ट्राफिक कार्यालयमा गई आफ्नो कागजपत्र लिन सहिने जानकारी महाशाखाले दिएको छ ।
ट्राफिक कार्यालयमा सेवा लिन आउने सम्पुर्ण सेवाग्राहीलाई सहज एवं सरल रुपमा सेवा दिन सधैं तत्पर रहेको महाशाखाले बताएको छ । साथै अबका दिनमा समेत थप प्रविधिमा जोड दिने महाशाखाले जनाएको छ । विभिन्न प्रविधिको प्रयोग गरि ट्राफिक जरिवाना भुक्तानी गर्न आम सेवाग्राहीलाई ट्राफिक प्रहरी महाशाखाले अनुरोध समेत गरेको छ ।
