काठमाडौं । विश्वका सबै देशका अन्तर्राष्ट्रिय विमानस्थलमा यात्रु जहाजमा चढ्ने अन्तिम बिन्दु स्टायरल कक्षसँगै टी एण्ड कफी सप संचालनमा छन् । तर नेपालको संचालनमा रहेको एकमात्र त्रिभुवन अन्तर्राष्ट्रिय विमानस्थलको स्टायरल कक्षसँगैको स्थानमा विमानको प्रतिक्षामा बस्ने यात्रुका लागि टी एण्ड कफी पसल छैन । भोक लागेमा केही खानेकुरा किनेर खाने सुविधा समेत छैन ।
विमानस्थलमा सबै सुरक्षा जाँचपछि हवाइजहाजमा चढ्नुअघि प्रतिक्षा गर्ने ठाउँलाई स्टायरल कक्ष भन्ने गरिन्छ । विश्वका जुनसुकै मुलुकमा पनि इष्टेराइल एरियामा टी उण्ड कफी सप खोलिएको हुन्छ । यात्रुले किनेर खान मन लागेका कुरा सहजै पाउँछ । तर नेपालको त्रिभुवन अन्तर्राष्ट्रिय विमानस्थलको स्टायरल एरियामा भने कफी पसल समेत छैन । कहिलेकाहीँ यात्रुहरुले घन्टौंसम्म पनि स्टायरल कक्षमा विमानको प्रतिक्षा गर्नुपर्छ । यात्रुहरुले त्यसबीचमा कफी, चिसो पेय पदार्थ वा सामान्य खानेकुरा (स्न्याक्स) हरु खान खोज्दा पनि पाउन सकेका छैनन् ।
त्रिभुवन अन्तर्राष्ट्रिय विमानस्थलबाट विदेश जाने यात्रुहरुले स्टायरल कक्षमा टी एण्ड कफी सप नभएकोबारेमा नागरिक उड्डयन प्राधिकरणका कर्मचारीलाई गुनासो गर्ने गरेका छन् । नेपालको विमानस्थलबाट अमेरिका गएका एक यात्रुले प्राधिकरणका एयरपोर्ट प्रमुखलाई लेखेको गुनासो यस्तो छ–‘त्रिभुवन अन्तर्राष्ट्रिय विमानस्थलमा सबै सुरक्षा जाँच सकिसकेपछि स्टायरल कक्षमा ९० मिनेट कुर्नुपरेको थियो । मलाई एकदमै भोक लागेको थियो, केही कफी र स्न्याक्स खान मन लाग्यो ।
मैले वरिपरि हेरें, तर एउटा पनि पसल देखिएन । मैले सुरक्षाकर्मीलाई सोधें, भित्र पसल थिएन, स्टायर कक्षबाट बाहिर निस्कन पाइँदैन भने । म जस्तै सयौं यात्रुहरु जसलाई खान पिउन मन लागेको थियो होला, तर दुर्भाग्यबस त्यो सम्भव थिएन ।’ यात्रुले एयरपोर्टका अधिकारीलाई प्रश्न गरेका छन्–‘यसरी यात्रुलाई किनेर खान समेत पसल खोल्न नदिंदा एयरपोर्टले कसरी कर उठाउन सक्छ ?’
अन्तर्राष्ट्रिय विमानस्थलको मापदण्डमा पनि स्टायरल एरियामा कफी सप राखिएको हुन्छ । तर नेपालमा भने कहीँ नभएको जात्रा हाँडीगाउँमा भनेझैं विमानस्थलको आम्दानी बढ्ने र अन्तर्राष्ट्रिय विमानस्थलको मापदण्ड अनुसार हुनैपर्ने पसल समेत संचालन गर्न दिइएको छैन । सुरक्षा जाँच सकिएपछि यात्रुहरुको सुविधाकै लागि हरेक अन्तर्राष्ट्रिय विमानस्थलमा कफी सप रहेको हुन्छ भन्ने कुरा नागरिक उड्डयन प्राधिकरणका अधिकारीहरुलाई थाहा भए पनि नेपालमा संचालन हुनसकेको छैन ।
त्रिभुवन अन्तर्राष्ट्रिय विमानस्थलको स्टायरल कक्षमा २०७६ माघ २७ सम्म टी एण्ड कफी पसल संचालनमा थियो । तर विद्युत सर्ट भई २०७६ माघ २७ मा आगलागी भएपछि टी एण्ड कफी सप नै बन्द गरिएको छ । २ बर्षसम्म पनि उक्त पसल संचालन हुन सकेको छैन । विद्युत सर्ट भए त्यसको स्थायी समाधान खोजेर पसल संचालन गर्नुपर्नेमा प्राधिकरणले पसल नै बन्द गर्दा देशी विदेशी यात्रुहरु मर्कामा परेका छन् ।
त्रिभुवन अन्तर्राष्ट्रिय विमानस्थलले स्टायरल कक्षमा टी एण्ड कफी सप खोल्न दिंदा एक त एयरपोर्टको आम्दानी बृद्धि हुन्छ भने अर्कोतिर यात्रुले पनि सुविधा पाउँछन् । अन्तर्राष्ट्रिय विमानस्थलको स्ट्यान्डर्ड पनि कायम हुन्छ ।
नागरिक उड्डयन प्राधिकरणका प्रवक्ता देवचन्द्रलाल कर्णले भने–‘विश्वका सबै देशका इन्टरनेशनल एयरपोर्टको इष्टेराइल एरियामा कफी सप संचालन हुन्छन् ।’ त्रिभुवन अन्तर्राष्ट्रिय विमानस्थलको स्टायरल कक्षसँगै टी एण्ड कफी पसल संचालन हुन नसकेकोबारेमा भने उनले केही पनि भन्न नसक्ने बताए ।
