काठमाडौं । नेपाली काँग्रेसको १४औँ महाधिवेशनमा मधेसी खुलाबाट विजयी विनोद चौधरीलाई केन्द्रीय सदस्यबाट पदमुक्त नगरे अदालत जाने डा. सुवासचन्द्र यादवले बताएका छन् ।नेपाली कांग्रेसको केन्द्रीय सदस्यमा मधेशी कोटाबाट निर्वाचित उद्योगी विनोद चौधरीको पद खारेजीको माग गर्दै केन्द्रीय निर्वाचन समितिमा उजुरी परेको छ।
चौधरी विधान विपरित केन्द्रीय सदस्य बनेको भन्दै उनको स्थानमा आफूलाई केन्द्रीय सदस्य बनाउन माग गर्दै सिरहा क्षेत्र नम्बर ३ का महासमिति सदस्य सुभाषचन्द्र यादवले समितिमा उजुरी दिएका हुन्। हालसालै सम्पन्न १४ औं महाधिवेशनको लागि नेपाली कांग्रेसको विधान, २०१७ (संशोधनसहित) ले केन्द्रीय पदाधिकारी तथा सदस्यहरुको लागि निश्चित मापदण्ड बनाएको भए पनि त्यस विपरित चौधरी केन्द्रीय सदस्य बनेको उजुरीमा उल्लेख गरिएको छ।
यादवले निर्वाचन समितिमा दिएको उजुरीमा भनिएको छ ,’मापदण्ड विपरित केन्द्रीय सदस्य मधेशी खुला ५ पदका लागि भएको प्रतिस्पर्धामा विधानको व्यवस्था विपरित विनोद चौधरी निर्वाचित भएको भनिएकोले निजलाई उक्त केन्द्रीय सदस्य पदबाट हटाई निजको ठाउँमा म निवेदन निकटतम् प्रतिस्पर्धी डा सुभाषचन्द्र यादवको नाम समावेश गरी पाउन उजुरी निवेदन गर्दछु।’
यादवले कांग्रेस विधानमा १० वर्ष निरन्तर नेपाली कांग्रेसको क्रियाशील सदस्य भएको महाधिवेशन प्रतिनिधिबाट ४ महिलासहित ९ जना मधेशी केन्द्रीय सदस्य बन्न पाउने व्यवस्था रहेको निवेदनमा उल्लेख गरेका छन्।
उनले केन्द्रीय सदस्यमा निर्वाचित विनोद चौधरी नेपाली कांग्रेसमा निरन्तर १० वर्ष क्रियाशील नभएकाले उनी केन्द्रीय सदस्यमा उम्मेदवार नै हुन नपाउने स्पष्ट रहेको उनले उल्लेख गरेका छन्। चौधरी २०७४ सालमा नेकपा एमालेबाट कांग्रेसमा प्रवेश गरेका थिए।
‘चौधरीजीले मनोनयन दर्ता गर्ने बेलामा नै मैले उजुरी दिन खोजेको थिएँ तर मेरो उजुरी त्यो बेला लिइएन, त्यसपछि निर्वाचन समितिमा संयोजक कृष्णगोपाल घिमिरेलाई उजुरी लिन नमानेको बारेमा जानकारी गराएँ,’ यादवले भने, ‘तर, उहाँले विधानले नदिए पनि पार्टीबाट लेखाएर आउनु भएको छ भन्ने कुरा गर्नुभयो, मैले भने कसैले लेखाएर हुने भए विधान किन बनाउनु पर्यो तर उहाँले कुनै जवाफ दिनु भएन ।’
उनका अनुसार १६ मङ्सिरमा दिएको उजुरी काँग्रेस केन्द्रीय कार्यालयले १ सय ३५ दर्ता नम्बरमा चार दिनपछि अर्थात् २० पुसमा दर्ता गरेको छ ।निर्वाचन आयोगले यादवको उजुरीलाई दर्ता नम्बर ११२६ मार्फत सम्बोधन गरेको छ । मधेसी खुलातर्फका उम्मेदवार यादव छैटौँ स्थानमा रहेर पराजित भएका थिए तर १० वर्ष क्रियाशील सदस्यता नभएका चौधरीलाई उम्मेदवार मात्रै नभई विजयी पनि बनाएको भन्दै यादवले काँग्रेसको निर्वाचन समिति, सानेपा र निर्वाचन आयोग, कान्तिपथ दुवैमा लिखित उजुरी हालेका हुन् ।
