काठमाडौं। जि-फोर एस सेक्युरिटी सर्भिसेज नेपाल प्रालिले सामाजिक सुरक्षा ऐन २०७४ कार्यान्वयन नगरेको र आफूहरुको सेवा, सुविधा घटाएको भन्दै सेक्यूरिटी मजदुरहरुले आन्दोलन गरेका छन्।
उनीहरुले श्रम ऐन तथा सामाजिक सुरक्षा ऐन २०७४ पूर्ण रुपमा कार्यान्वयन नगरेको तथा आफूहरुले पाइरहेको सेवा, सुविधा घटाउने कार्य गरेको भन्दै अखिल नेपाल सेक्यूरिटी मजदुर संघ आन्दोलनमा उत्रिएको हो।
संघले मंगलबार जि फोर एस सेक्युरिटी सर्भिसेज नेपाल प्रालिको कार्यालय अगाडि कालो ब्यानर, कालो झण्डासहित प्रदर्शन गरेको छ।कम्पनीले सामाजिक सुरक्षा कोषमा जानु पूर्व उपदान, सञ्चय कोषको रकम फिर्ता नगरेको, उपदान वापतको रकम नागरिक लगानी कोषमा जम्मा नगरी आर्थिक हिनामिना समेत गरेको संघको आरोप छ। जि फोर एस व्यवस्थापनसँग पटक पटक वार्ता गरे पनि आफूहरुको माग सुनुवाइ नभएकाले आन्दोलनमा उत्रिनु परेको अखिल नेपाल सेक्युरिटी मजदुर संघ जि फोर एस कमिटीका अध्यक्ष राजेन्द्र पाठकले बताए ।
उनीहरुले सरकारले तोकेको न्युनतम पारिश्रमिक १५ हजार रुपैयाँ पाउनुपर्ने, १ वर्ष पूरा भएका श्रमिकको मासिक पाउने आधारभूत पारिश्रमिकको कम्तिमा आधा बराबरको वार्षिक ग्रेड रोकिएकाले त्यसलाई नियमित गर्नुपर्ने माग राखेका छन्।
सामाजिक सुरक्षा कोषमा जानुपूर्वको उपदान र सञ्चयकोषको रकम तुरुन्त फिर्ता गर्नुपर्ने, श्रमिकको बिदा स्वीकृत गरी ८ घण्टा बराबरको पारिश्रमिक दिने व्यवस्था गर्नुपर्ने लगायतको माग पनि रहेको छ।
