काँग्रेस १६ जिल्लामा सभापतिका आकांक्षी

काठमाडौं । नेपाली काँग्रेसले बाँकी रहेका १६ जिल्लाको अधिवेशन पुस २७ मा गर्ने भएको छ । प्रदेश २ का ८ जिल्ला र बागमतीका ४, गण्डकीको १, लुम्बिनी प्रदेशको एक र सुदूरपश्चिम प्रदेशका २ जिल्लामा अधिवेशन हुन बाँकी छ । अब २७ गते जिल्ला अधिवेशन हुने काँग्रेसको केन्द्रीय निर्वाचन समितिका संयोजक गोपालकृष्ण घिमिरेले बताए ।त्यसका लागि २४–२५ गते निर्वाचन अधिकृत सम्बन्धित जिल्लामा पुगिसक्ने उनको भनाइ छ । घिमिरेका अनुसार निर्वाचन समितिले सुरुवामा खटाएकै निर्वाचन अधिकृतलाई जिल्ला अधिवेशनका लागि पठाउने छ ।

काँग्रेसले सप्तरीमा डा.रुद्र शर्मा, सिराहामा सन्जिव लामा, धनुषामा अरुण ज्ञवाली, महोत्तरीमा इन्द्र अधिकारी, सर्लाहीमा धिरेन्द्र चौधरी, रौतहटमा दीपकराज गिरी, पर्सामा नरेन्द्र केसी र बारामा ज्ञानेन्द्रपसाद अधिकारीलाई निर्वाचन अधिकृत बनाएर पठाइएको थियो ।कैलालीमा टेकप्रसाद सुवेदी, अछाममा देवराज भट्ट र बाँकेमा रेवतीरमण भट्टराईलाई निर्वाचन अधिकृतको जिम्मेवारी दिइएको छ । चितवनका निर्वाचन अधिकृतले राजीनामा दिएकाले अर्को पठाएको छैन ।मकवानपुरमा गोवी सुवेदी सिन्धुपाल्चोकमा देव महत र सिन्धुलीमा लेखबहादुर खड्काले निर्वाचन अधिकृतको जिम्मेवारी पाएका छन् । उनीहरुले जिल्ला अधिवेशन गराउने छन् ।

धनुषामा सभापतिमा निधि धनुषा जिल्ला कार्यसमितिका वर्तमान सभापति महेश शंकर गिरीलाई दोहोर्याउने पक्षमा रहेको बुझिएको छ यद्यपि, सन्तोष र विश्वेश्वरले सभापतिका लागि भित्रभित्रै लबिङ गरिरहेको बुझिएको छ ।सप्तरीमा देउवा टिमबाट जिल्ला सचिव शत्रुधनप्रसाद यादव, क्षेत्रीय सभापति रामप्रसाद मण्डल र नेतृ निर्मलादेवी यादवलाई प्रवल दाबेदारका रुपमा हेरिएको छ ।पौडेल टीमबाट सभापतिका प्रत्यासी रामदेव साह यसपटक फेरि उठ्ने तयारीमा न्छन् ।

रामकुमार यादव, बद्रीनारायण यादव र नारायण चौधरीले पनि जिल्ला नेतृत्वका लागि लबिङ गरिरहछ ।महोत्तरीमा नयाँ नेतृत्वका लागि देउवा पक्षका सुशील यादव र शेखर कोइराला पक्षका नागेश्वर यादव आकांक्षी देखिएका छन् । सभापतिमा आकांक्षा देउवा पक्षका सन्दीप नारायण पाठक र कोइराला समूहका बजरङ्गी नेपालीको क्षेत्रमा क्षेत्रीय अधिवेशन समेत भएको छैन ।

सर्लाहीमा जिल्ला अधिवेशन अनिश्चित छ । सर्लाही क्षेत्र नम्बर २ को अधिवेशन पुनः गर्न माग गरेर निर्वाचन समितिमा उजुरी परेको छ । समावेशी ढंगले महाधिवेशन प्रतिनिधि चयन हुन नसकेको भन्दै पुनः अधिवेशन गराउन माग गरिएको छ ।सभापति नागेन्द्रकुमार राय महाधिवेशन प्रतिनिधिमा पराजित भएपछि जिल्ला थप अन्योल भएको हो । देउवा समूहबाट सभापति राय दोहोरिने रणनीतिमा थिए ।

रौतहटमा जिल्ला सभापतिका लागि सुनील यादव, हृदयनाराण यादव र रामचन्द्र गिरीको नाम चर्चामा छ । सुनील र हृदयनाराण देउवा टीममा दाबेदार हुन् भने रामचन्द्र गिरी कोइराला समूहबाट सभापतिको उम्मेदवार हुन प्रयास गरिरहेका छन् । बारा जिल्लामा काँग्रेस सभापतिका लागि वर्तमान जिल्ला सभापति जयचन्द्र चौरसिया महाधिवेशन प्रतिनिधिमा पराजित भएपछि देउवा समूह नयाँ उम्मेदवारको खोजीमा छ ।

देउवा टिमबाट सभापति पूर्व सभापति राजेशचन्द्र यादवको छोरा राजेशराय यादव सभापतिको तीव्र लबिङ गरिरहेका छन् ।यस्तै कोइराला टिमबाट नेता रमानन्द यादव, पूर्व सभापति लालबाबुसिंह र पूर्व पार्टी सचिव रामअयोध्या यादवले सभापतिका लागि लबिङ गरिराखेका छन् ।
सिरहामा देउवा पक्षीय वर्तमान जिल्ला सभापति रामचन्द्र यादव दोहोरिने रणनीतिमा छन् । देउवा पक्षबाट रामचन्द्रको विरुद्धमा रामसुन्दर चौधरी पनि सभापतिको उम्मेदवार हुने लाइनमा छन् । कोइराला टिमबाट नेताहरु अम्बरबाबु, अमिर यादव लगायतको पनि सभापतिमा दाबी छ ।

पर्सामा काँग्रेस नेतृत्वका लागि देउवा प्यानलबाट पर्सा सभापति बनेका द्विवेदी फेरि पनि सभापति बन्ने रणनीतिमै रहेको बुझिएको छ ।द्विवेदीको विकल्पमा जनार्दन क्षेत्रीले तयारी थालेका छन् । उपसभापति प्रकाश उपाध्याय, सचिव श्याम कट्टेल लगायतका नेताहरु पनि सभापतिका लागि लबिङ गरिरहेका छन् ।

कैलालीमा काँग्रेसको जिल्ला सभापतिका आकांक्षीको लागि प्रकाश बम, नारायणदत्त भट्ट, भीम बडुवाल, खेमराज चौधरी, गणेश देउवा लगायतको चर्चा छ ।

अछाममा काँग्रेस सभापतिका लागि देउवा पक्षमै प्रतिस्पर्धा हुने देखिएको छ । देउवा टिमबाट वर्तमान सभापति भरतकुमार स्वारले दोहोरिन खोजेका छन् । पूर्वसभापति पुष्पबहादुर शाहले पनि सभापतिका लागि लबिङ बढाएका छन् ।शेखर कोइराला समूहबाट राजन कुँवर सभापतिका दाबेदार छन् । महामन्त्री गगन थापा निकट कुँवरले जिल्ला सभापतिका लागि उम्मेदवारी समेत घोषणा गरिसकेका छन् ।

नवलपरासी पूर्व (नवलपुर) मा काँग्रेसको जिल्ला सभापतिमा मदन भट्ट अधिकारी, महेन्द्रध्वज जिसी र बालकृष्ण घिमिरे पनि सभापतिका आकांक्षी देखिएका छन् । अधिकारी र बालकृष्ण घिमिरे शशांक कोइराला निकट मानिन्छन् भने महेन्द्रध्वज जिसी वरिष्ठ नेता रामचन्द्र पौडेल पौडेल निकट हुन् ।

बाँकेमा जिल्ला सभापतिका ५ आकांक्षी देखिएका छन् । जिल्ला सभापतिका लागि सुरेन्द्र हमाल, निरञ्जन सिजापति, राजकुमार बर्मा, बादशाह कुर्मी, नारायण गौडेल रुचि देखाएका छन् ।देउवा पक्षबाट हमाल, सिजापति, बर्मा, कुर्मीबीच रस्साकस्सी छ भने शेखर कोइराला प्यानलबाट गौडेल सभापतिको उम्मेदवार छन् ।चितवनको नेतृत्वका लागि कैलाश कोइराला, उत्तम जोशी, प्राडा सूर्यकान्त घिमिरे, मिलनबाबु श्रेष्ठ, राजेश्वर खनाल र विजय शर्मा भुषाल सभापतिको दौडमा छन् ।

कोइराला, जोशी, घिमिरे, खनाल र भुषाल शेखर कोइराला समूहबाट सभापतिका लागि लबिङ गरिरहेका छन् भने देउवा पक्षबाट मिलनबाबु श्रेष्ठ उम्मेदवार भन्ने तयारीमा छन् ।मकवानपुरमा सभापतिमा उपसभापति विष्णु लामिछाने, सचिव बुद्ध लामा, अशोक शाक्य र आनन्दराम पराजुली देउवा समूहबाट सभापतिमा दाबी गरिरहेका छन् । नेता प्रकाशमान सिंह निकट नेविसंघका महामन्त्री प्रभात दाहाल र शेखर कोइराला निकट रगुरमण न्यौपान पनि सभापतिको आकांक्षी छन् ।

सिन्धुपाल्चोक सभापतिका लागि देउवा समूहबाट प्रेमध्वज लामा, विष्णुविक्रम थापा र विकास तामाङ सभापतिका दाबेदार छन् ।शेखर कोइराला समूहबाट सभापतिमा शिव सुनार, बिलबहादुर तामाङ र बंशलाल तामाङको दाबी छ । सिन्धुली जिल्ला सभापतिका लागि वर्तमान जिल्ला सभापति उज्ज्वलप्रसाद बराल शेखर कोइराला समूहको प्रतिनिधित्व गर्दै उनी सभापतिमा दोहोर्याउने तयारीमा छन् । तर कोइराला समूहकै वर्तमान उपसभापति खड्गबहादुर वाइबा र पूर्वसचिव उपेन्द्र पोखरेल पनि सभापतिका दाबेदार हुन् ।यस्तै देउवा समूहबाट माणिक ढकाल र प्रेमचन्द्र दाहालले सभापतिमा दाबी गरेका छन् ।