विराटनगर । विराटनगर महानगरपालिका–१५ रानीका २८ वर्षीय अमित साहले नाबालिका छोरीसहित श्रीमती फिजा फरिन (साह)लाई ससुराली पक्षले बेपत्ता बनाइदिएको गुनासो गरेका छन् ।भारतको जोगवनी घर भएकी मुस्लिम समुदायकी फिजासँग ६ वर्षअघि अमितको अन्तरजातीय प्रेम विवाह भएको थियो । अमित र फिजाका एक वर्षकी छोरी पनि छन् । छोरीसहित श्रीमतीलाई ससुरालीले बेपत्ता बनाएको भन्दै उनले खोजीका लागि सहयोग गरिदिन सबैमा आग्रह गरेका छन् ।
‘बिहे भएपछि हामी दुई जनालाई छुटाउनका लागि ससुराली पक्षबाट धेरै प्रयासहरु भए । बारम्बार धम्क्याउने र थर्काउने काम पनि भयो,’ अमितले भने, ‘शान्ति सुरक्षाको माग गर्दै २०७६ साल मंसिर २३ गते जिल्ला प्रशासन कार्यालय मोरङमा निवेदन पनि दिएँ । त्यसपछि उनीहरु चुप लागेर बसेका थिए ।’ तर एक्कासि एकाबिहानै सासू बेबी खातुन र ससुरा सुल्तान अहमदसहितका ससुराली पक्षका मानिसहरु आएर घरबाटै श्रीमती र छोरीलाई लिएर गएको गुनासो उनको छ ।
उनका अनुसार गत साउन २२ गते बिहान ६ बजेतिर घरमा आएर फकाईफुल्याई लिएर गएका हुन् । ‘श्रीमतीलाई घरदेखि तल झर्न लगाएर फकाएछन् । पछि हेर्न मन लागेको छ भनेर छोरी पनि लिएर आउन भनेछन्,’ अमितले भने, ‘त्यसपछि अपहरण शैलीमा भारतीय नम्बर प्लेटको स्कोरपिओमा राखेर दुवै जनालाई लगे । खोज्दाखोज्दै हैरान भइसके पनि अझै फेला पार्न सकिरहेको छैन ।’
ससुराली पक्षले लिएर गएपछि ४ महिनादेखि श्रीमती र छोरीसँग आफूलाई सम्पर्कविहीन बनाइएको उनको गुनासो छ । श्रीमती र छोरी खोज्दै जोगवनीस्थित ससुराली घरमा बारम्बार पुगे पनि आफूले फेला पार्न नसकेको उनले बताए । ‘श्रीमती र छोरीलाई ससुराली घरमा नराखिकन अन्यत्रै लगेछन् । ससुरालीमा पनि अहिले कोही बस्दैछन्,’ उनले भने, ‘खोजी गर्दै बारम्बार त्यहाँ पुगिसकें । ससुराली पक्ष अहिले जोगवनीमा नबसिकन अन्यत्रै बस्न थालेको जानकारी पाएँ ।’ अमितले जबरजस्ती ससुराली पक्षले लगेर ४ महिनादेखि श्रीमती र छोरीलाई बेपत्ता बनाइदिएपछि आफ्नो बिल्लिबाठ भएको गुनासो पोखे ।
श्रीमती र नाबालिका छोरीलाई बेपत्ता बनाएकै दिनदेखि खोजी जारी राखे पनि फेला पार्न नसकक्दा आफू थाकिसकेको र अहिले ससुराली पक्ष पनि आफूसँग सम्पर्कविहीन बनेको उनले बताए । श्रीमती र छोरीको खोजीका लागि उनले प्रहरीमा पनि निवेदन दिएका छन् । साथै श्रीमती तथा छोरीलाई बेपत्ता बनाउनेविरुद्ध मानव बेचबिखन तथा अपहरण मुद्दामा किटानी जाहेरी दिएका छन् ।
उनले इलाका प्रहरी कार्यालय रानीका प्रहरी निरीक्षक प्रकाश राउतलाई भेटेर श्रीमती र छोरीको अवस्था पत्ता लगाउनका लागि सहयोग गर्न आग्रह गरे । प्रनि राउतले अमितले निवेदन दिएदेखि नै प्रहरीले खोजीलाई तीव्र बनाएको बताएका छन ।
