काठमाडौं । सिन्धुपाल्चोकको हेलम्बु गाउँपालिका–१ स्थित खार्चुङमा किराना पसल चलाउँदै आएका ७३ वर्षीय केर्साङ्ग लामाको हत्या भयो । कार्तिक १८ मा राति केर्साङ्गको हत्यापछि आरोपीहरूले नगद लुटेर भागेका थिए ।हत्या गरेर भागेका दुई जनालाई प्रहरीले काठमाडौँबाट पक्राउ गरेको छ ।
केर्साङ्ग लामाको हत्यामा संलग्न दुई जनालाई काठमाडौँको नागढुंगा र माकलबारीबाट पक्राउ गरिएको महानगरीय प्रहरी परिसर काठमाडौँका एसपी रमेश कुमार बस्नेतले रातोपाटीलाई बताए ।पक्राउ पर्नेमा हेलम्बु गाउँपालिका–१ सिन्दृघ्याङ घर भएका १९ वर्षीय तेन्जिङ लामा ‘हेल्मु’ र वर्ष ३० का दावा दोर्जे लामा छन् ।
महानगरीय प्रहरी परिसर काठमाडौँ र सिन्धुपाल्चोकबाट खटिएको संयुक्त टोलीले उनीहरूलाई आइतबार पक्राउ गरेर सिन्धुपाल्चोक लगेको छ । आरोपीहरूलाई मंगलबार पत्रकार सम्मेलन गरेर सार्वजनिक गरिने जिल्ला प्रहरी कार्यालय सिन्धुपाल्चोकका डिएसपी दक्षकुमार बस्नेतले बताए ।
तेन्जिङ लामा (हेल्मु) काठमाडौँको गोकर्णेश्वर नगरपालिका–८ माकलबारीबाट पक्राउ परेका हुन् ।
दावा दोर्जे लामालाई नागढुंगा चेकपोष्टबाट पक्राउ गरिएको एसपी बस्नेतले बताए । टाउकोमा हिर्काएर केर्साङ्गको हत्या गरेर अरोपीहरूले १ लाख ५० हजार नगद, रिचार्ज कार्ड र थाङ्का लुटेर भागेको प्रहरीको अनुसन्धानबाट थाहा भएको छ ।
