रौतहट । नेपाल कम्युनिस्ट पार्टी ( माओवादी केन्द्र ) त्यागेर नेकपा एमालेको नेता बनेका प्रभु साहले माओवादी अध्यक्ष पुष्पकमल दाहाल ‘प्रचण्ड’ नेपाल कम्युनिष्ट पार्टीका महासचिव केशरजंग रायमाझीको नयाँ अवतार रहेको आरोप लगाएका छन् ।
शनिबार दीपावली तथा छठ पर्वको अवसरमा शनिबार रौतहटको कटहरीया नगरपालिका–१, भसेढवामा आयोजित शुभकामना आदानप्रदान कार्यक्रममा प्रचण्ड कांग्रेसको पुच्छर बनेको भन्दै केशरजंग रायमाझीको नयाँ अवतार रहेको साहले आरोप लगाए ।
अध्यक्ष प्रचण्डले विगतमा कांग्रेसी फाँसीवादविरुद्ध जनयुद्ध लडेको र अहिले शहिदको अपमान गरेको नेता साहको आरोप छ । अन्ततः प्रचण्ड कांग्रेसकै लंगौटी बनेर केशरजंग रायमाझीको नयाँ रुप देखाएको साहको टिप्पणी छ ।
नेता साहले प्रचण्डले पतनको दिशा आफैँ चयन गरेको पनि आरोप लगाएका छन् । प्रचण्डको यो अवतर नेपाली ईतिहासमा नौलो नभई केशरजंग रायमाझी प्रवृतिको पुनरावृत्ति हो ।
तत्कालीन नेपाल कम्युनिस्ट पार्टीका महासचिव, पूर्वमन्त्री र राजसभा स्थायी समिति सभापति रहका केशरजंग रायमाझीले पार्टीको नियमविपरीत राजालाई साथ दिएका थिए । त्यसपछि उनलाई पुष्पलाल श्रेष्ठ र तुलसीलाल अमात्यहरूले गद्धारी भन्दै पार्टीबाट रायमाझीलाई हटाएका थिए ।
