धनगढी । जिल्ला अदालत कैलालीले दुई प्रहरीको हत्या गरेको अभियोगमा पक्राउ परेका ९ जनालाई जन्मकैदको फैसला सुुनाएको छ ।मंगलबार जिल्ला न्यायाधिश जयानन्द पनेरुको एकल इजलासले धनगढीको अस्थायी प्रहरी पोष्ट जुगेडामा कार्यरत प्रहरी सहायक निरीक्षक गोविन्द विक र प्रहरी जवान रामबहादुर साउदको हत्या अभियोगमा पक्राउ परेका ९ जनालाई जन्मकैदको फैसला सुनाएको हो ।
साथै एक जनालाई सफाइ दिएको अदालतले जनाएको छ। जन्म कैदको सजाय पाउनेहरुमा मुुख्य योजनाकार धनगढी उपमहानगरपालिका-१० का ३५ वर्षीय सुुकबहादुर राना भनिने अमर राना, २३ वर्षीय पर्कु भनिने रोहित राना, सोही ठाउँ बस्ने अर्का रोहित राना, ३० वर्षीय सुरेश राना, २० वर्षीय राजेन्द्र राना, गब्बर भनिने २५ वर्षीय राजकुमार राना, २२ वर्षीय रामनिवास राना, २९ वर्षीय टल्लु भनिने दलराम राना र धनगढी उपमहानगरपालिका-११ बस्ने गोपाल भनिने २५ वर्षीय रामगोपाल राना रहेका छन्।
यस्तै, अर्का अभियुक्त धनगढीका मटर व्यापारी राजिव गुप्ताले भने सफाइ पाएको अदालतले जनाएको छ।अस्थायी प्रहरी पोष्ट जुगेडामा कार्यरत असई गोविन्द विक र जवान रामबहादुर साउदलाई ‘केराउ तस्कर’ले हत्या गरेको प्रहरीको प्रारम्भिक अनुसन्धानको निष्कर्ष थियो। धनगढी उपमहानगरपालिका–१० स्थित गोविन्द र रामबहादुरको शव फेला परेको ठाउँ नजिकै छरिएको अवस्थामा केराउ भेटिएको थियो।
गत वर्ष कात्तिक १ गते तस्करी नियन्त्रणमा खटिएका बेला सो समूहले असई विक र जवान साउदको विभत्स हत्या गरेको थियो। हत्यामा संलग्न ७ जना अरोपीलाई जिल्ला प्रहरी कार्यालय कैलालीले पक्रेर पत्रकार सम्मेलनमार्फत सार्वजनिक गरेको थियो। पक्राउ पर्नेमा धनगढी–१० का ३१ वर्षीय रोहित राना उर्फ पर्कु, २० वर्षीय राजेन्द्र राना, ३० वर्षीय सुरेश राना, २५ वर्षीय राजकुमार राना उर्फ गब्बर, २२ वर्षीय राम निवास राना, २९ वर्षीय दलराम राना उर्फ टल्लु र २५ वर्षीय रामगोपाल राना थिए।
प्रहरी सहायक निरीक्षकबाट प्रहरी सेवामा प्रवेश गरेका विक प्रहरी निरीक्षकको तयारीमा थिए । ।’ तस्करी नियन्त्रणमा कडाइ गर्दा भाइको हत्या भएको मृतकका दाइ रमेशले बुझाइ छ । विपन्न दलित परिवारका गोविन्द आफ्नै बलबुताले प्रहरी सेवामा प्रवेश गरेका थिए । साताअघि मात्रै भाइसँग फोनमा पारिवारिक कुराकानी भएको उनले बताए । आफन्तका अनुसार गाउँकै विद्यालयबाट एसएलसी पास गरेका उनले कैलाली बहुमुखी क्याम्पसबाट स्नातक तह उत्तीर्ण गरेका थिए ।
गोविन्द नौ वर्षको हुँदा उनका बुबा बितेका थिए । सहारा केही थिएन, बुबा बितेपछि परिवारको पालनपोषणको अभिभारा आमा कलावतीको काँधमा आयो । सम्पत्तिका नाममा ओत लाग्ने सानो झुपडी थियो । कमाइ खान जमिन थिएन । आफ्ना सन्तानलाई हुर्काउन कलावतीले निकै हण्डर खाइन । तैपनि छोराछोरीलाई पढाएर ठूलो मान्छे बनाउने उनको सपना थियो । दाइभाइले पढाइमा धेरै रुचि देखाएनन् । दाइ खेती–किसानीमा जुटे । कान्छो भाइले पनि एसएलएसी दिएपछि पढाइ छोडे । दिदीको विवाह भयो ।
तर, गोविन्दले पढाइ छोडेनन् । स्थानीय बागेश्वरी माविबाट एसएलसी पास गरे । थप अध्ययनका लागि धनगढी आए । धारिलो हतियार प्रहार गरेर उनको बीभत्स हत्या भयो । धारिलो हतियारले घाँटी रेटिएको अवस्थामा धनगढी–१०, वनकट्टीघाटस्थित नेपाल–भारत सिमानामा बग्ने मोहना नदीमा उनको शव फेला पऱ्याे ।जिल्ला प्रहरी कार्यालयका अनुसार घटना हुनुभन्दा दुई दिनअघि मात्र विकले त्यही नाकामा स्थानीय व्यक्तिहरूबाट अवैध रूपमा भित्र्याइँदै गरेको सामान बरामद गरेका थिए ।
उनले त्यहाँ खटिएदेखि नै नाकामा कडाइ गरेका थिए । सीमामा कडाइ गरिएपछि वर्षौँदेखि निर्वाध रूपमा तस्करी गर्नेहरूका लागि अवरोध बनेकाले उनी तस्करको निशानामा परेको स्थानीय बताउँछन् । उक्त क्षेत्र तस्करीको ट्रान्जिट प्वाइन्ट मानिन्छ ।
