जनकपुरधाम । जनमत पार्टीका अध्यक्ष डा. सिके राउतले आफू बाटोकै कारण घरभित्र थन्किन बाध्य भएका बताएका छन् । ठेकेदारले बाटो खनेर छोडिदिँदा जनकपुरधामस्थित घरमै थन्किनुपरेको उनले बताएका छन् ।
जनकपुरधाम उप महानगरपालिका ८ स्थित बलुवा टोलमा राउतको घर छ । जनकपुरधामको केन्द्र रमानन्द चोकभन्दा करीब पाँच मिनेटकै दूरीमा आफ्नो घर रहेपनि बाटोका कारण कतै निस्किन नपाइएको उनले बताएका छन् ।
असारको पहिलो साता ठेकेदारले कामदारलाई वर्षामा रूझेरै भए पनि बाटो खन्न लगाएपनि त्यसपछि त्यसै छाडिएको उनले बताएका छन् । ‘बाटो खनेरै मरम्मतै नगरी तिनीहरू गए’ राउतले फेसबुकमा लेखेका छन्, ‘आफ्नो घरको छेउमै विद्यालय छ । विद्यालय जाने बाटो बन्द भएको छ ।’
बाटो बन्द मात्रै हैन, त्यहाँ पानी लागेर डुंगा चढेरै जानुपर्ने अवस्था रहेको भन्दै साउनदेखि विद्यालय खुलेपनि उत्तरतिरका बच्चाहरू अहिलेसम्म विद्यालय जान नपाएको उनले उल्लेख गरेका छन् ।
राउतले आफ्नो घरदेखि अर्कोपट्टीबाट निस्किने गल्लीबाट जसोतसो १–२ किलोमीटर घुमेर बजार निस्किन सकिने भएपनि त्यो बाटो पनि ८–१० दिन अगाडि खनेर ठेकेदार बेपत्ता भएको उनले बताएका छन् । ‘दुइटै तिरबाट बाटो बन्द भए पछि आफू पनि न त कार्यालय जान पाएको छु न त बजार नै । न त कुनै कार्यक्रममा नै जान सकेको छु ।’
उपमेयर र वडा अध्यक्ष शनिबार मात्रै यही टोल नजिकै आफ्नो पार्टी अध्यक्षलाई बोलाएर भाषण ठोकेको भएपनि यसतर्फ ध्यान नदिएको उनको भनाई छ ।
नरकपुर बनाइदियो
अध्यक्ष राउतले जनकपुरलाई यहाँका नेताहरुले नरकपुर बनाइदिएको समेत बताएका छन् ।
‘जनकपुरसँग के थिएन ?’ उनले भनेका छन्, ‘गौरवशाली ऐतिहासिक धार्मिक विरासत, बौद्धिकहरूको जमघट, पत्रकारहरूको घूँइचो, राजनीतिको प्रादेशिक केन्द्र, फालाफाल बजेट, अन्तराष्ट्रिय रूपमै ध्यानाकर्षण, देशविदेशको चासो, राष्ट्रिय अन्तरराष्ट्रिय अतिथीहरू थियो । यति अवसर हुँदा आज एउटा योग्य मान्छेको हातमा भएको भए जनकपुर कहाँबाट कहाँ फड्को मारिसकेको हुनेथ्यो । तर भिजनलेस भ्रष्टाचारीहरूको हातमा सीताको त्यो पावन जनकपुर आज नरकपुर बन्न पुगेको छ ।’
वडा÷उपमहानगरपालिका कार्यालयमा बाटो मरम्मत गरेर कम–से–कम हिँडडुल गर्ने बनाइदिन निवेदन दिएको महिना बितिसक्दा पनि कसैलाई केहि मतलव नदेखिएको गुनासो उनको छ ।
‘उपमहानगरपालिकाले खानेपानी संस्थानलाई गएर भन्नुस् भन्छ, खानेपानी संस्थानका डि.ई. ले ठेकेदारलाई गएर भन्नुस् भन्छ, ठेकेदारले मेयर–उपमेयरलाई गएर भन्नुस् भन्छ, यस्तैमा टोलवासीहरूले एक महिना बिताएछन्’ डा. राउतले भनेका छन्, ‘पत्र–पत्रिकाले लेख्ने वा टिवी च्यानेलहरूले जनताको पीडा देखाउने कुरै भएन । त्यही भएर टोलवासीहरूले मलाई नै एउटा पोस्ट गर्न भने ।’
