जनकपुर । प्रदेश २ मा प्रदेशसभाको अधिवेशन आह्वान गरिएको छ । मुख्यमन्त्री तथा मन्त्रीपरिषद्को बैठकबाट मुख्यमन्त्री लालबाबु राउतले प्रदेशसभाबाट असोज २० गते विश्वासको मत लिनका लागि अधिवेशन आह्वान गरिएको हो ।
मन्त्रीपरिषद्को बैठकबाट असोज २० गते मुख्यमन्त्री राउतले विश्वासको मत लिने अर्थ मन्त्री शैलेन्द्र प्रसाद साहले बताए । सत्तारुढ जनता समाजवादी पार्टी नेपाल विभाजित भएको ३० दिन भन्दा बढी भएको छ ।
अहिले प्रदेश २ मा जसपा, नेपाली कांग्रेस र नेकपा माओवादी केन्द्रको गठबन्धनको सरकारको छ । माधवकुमार नेपाल नेतृत्वको नेकपा एकीकृत समाजवादीले समेत मुख्यमन्त्री राउतलाई नै समर्थन गर्ने हुनाले उनीसँग स्पष्ट बहुमत रहेको छ ।
सरकारको विपक्षमा नवगठित लोकतान्त्रिक समाजवादी पार्टी नेपाल र नेकपा एमाले रहने छन् । लोसपाका संसदीय दलका नेता जितेन्द्र सोनलले प्रमुख प्रतिपक्षी भूमिका निर्वाह गर्ने जनाइसकेको छन् ।
