वीरगञ्ज । नेपाली सैनिक वार कलेज नगरकोटमा तालिमरत सबै हतियार कमान र स्टाफ कोर्स सिसं ३ का ५० जना अधिकृतबाट प्रहरी प्रधान कार्यालयको बुधबार अवलोकन भ्रमण भएको छ ।सो क्रममा उनीहरुले प्रहरी प्रधान कार्यालयस्थित कमाण्ड सेन्टर, केन्द्रीय पोलिग्राफ शाखा, डाटा सेन्टर, केन्द्रीय फरेन्सिक ल्याब, केन्द्रीय हेल्थ डेस्क र सङ्ग्रहालयसमेतको अवलोकन गर्नुभएको प्रहरी प्रधान कार्यालयले जनाएको छ । अवलोकनपश्चात् आयोजित कार्यक्रममा प्रहरी महानिरीक्षक शैलेश थापा क्षेत्रीले भ्रमणका क्रममा तालिमरत अधिकृतले नेपाल प्रहरी सङ्गठनको इतिहास एवं कार्य प्रकृतिसम्बन्धी यथेष्ट जानकारी हासिल गरेको विश्वास व्यक्त गरे ।
नेपाल प्रहरीसम्बन्धी विविध विषयमा तालिमरत अधिकृतले राखेका जिज्ञासाको निरुपण गर्दै प्रहरी महानिरीक्षक थापा क्षेत्रीले शान्ति सुरक्षा एवं विपद् व्यवस्थापनमा सबै सुरक्षा निकायबीच आपसी सहयोग र समन्वय भइरहेको बताए । आउँदा दिनमा समेत सकारात्मक कार्य सम्पन्न गर्न आपसी सहयोग र समन्वय आदानप्रदान हुने उनले उल्लेख गरे ।
प्रहरी उपरीक्षक सविन प्रधानले नेपाल प्रहरीको काम, कर्तव्य र वर्तमान अवस्थाबारे प्रस्तुतीकरण गरेको उक्त कार्यक्रममा सेनानी राहुल अधिकारीले भ्रमणमा सहभागी तालिमरत अधिकृतको तर्फबाट मन्तव्य व्यक्त गरेका थिए ।११ लाख सर्वसाधारणलाई निःशुल्क मास्क वितरण
‘तपाईँको मास्क खोइ ?’ कार्यक्रमअन्तर्गत नेपाल प्रहरीले गत वैशाख ६ गतेदेखि हालसम्म कूल ११ लाख ५३ हजार ४७० सर्वसाधारणलाई निःशुल्क मास्क वितरण गरिएको जनाएको छ । पछिल्लो २४ घण्टामा देशका विभिन स्थानमा सात हजार ३७९ लाई मास्क वितरण गरेको प्रहरी प्रधान कार्यालयले जनाएको हो ।
कोभिड–१९ सङ्क्रमणको रोकथाम तथा जोखिम न्यूनीकरणका लागि नेपाल प्रहरीद्वारा सञ्चालित ‘तपाईँको मास्क खोइ ? ’ कार्यक्रमअन्तर्गत दैनिकरूपमा सर्वसाधारण नागरिकलाई निःशुल्क मास्क वितरण गरिँदै आएको छ । नयाँ भेरियन्टसहितको कोभिड–१९ को सङ्क्रमण बढ्दै गएको सन्दर्भमा यसबाट सिर्जना हुनसक्ने समस्या र चुनौतीलाई दृष्टिगत गरी सङ्क्रमण रोक्न तोकिएको सुरक्षा मापदण्डलाई दुरुस्तरूपमा कार्यान्वयनका लागि नेपाल प्रहरीले ‘सङ्क्रमणबाट आफू बचौँ र अरुलाई पनि बचाऔँ’ भन्ने नारासहित ‘तपाईँको मास्क खोइ ?’ लगायतका विभिन्न सचेतनामूलक कार्यक्रमलाई अभियानकै रूपमा सञ्चालन गरिरहेको छ ।
सो क्रममा स्वास्थ्य मापदण्ड उल्लङ्घन गर्ने ८६९ लाई रोकी सम्झाइबुझाई छाडिएको छ । साथै देशभर सञ्चालित माइकिङ, प्लेकार्ड, पर्चा, पम्प्लेटसहितको ४४ वटा सचेतनामूलक कार्यक्रमअन्तर्गत आठ हजार ७३९ लाई सचेत गराइएको छ ।
