रौतहट । दक्षिण एशियाली खेलकुदमा नेपाललाई कुस्ती खेलमार्फत काँस्य पदक दिलाउने खेलाडी उपेन्द्रदास वैरागीको १० बर्ष अघि गृहनगर रौतहटको गौरमा हत्या भएको थियो । देशको एउटा गहनाको हत्या हुँदा खेलकुद क्षेत्र मात्र शोकाकुल बनेन । समग्र देशवासीलाई यो घटनाले पोलेको थियो ।
घटनापछि वैरागीको हत्यारा पत्ता लगाउँन चौतर्फी माग उठेको थियो र प्रहरीमाथि दबाब पनि बढेको थियो । घटना लगत्तै दबाब बढेपनि १० बर्ष पछि आएर वैरागीको हत्यारालाई प्रहरीले पक्राउ गर्न सफल भएको छ ।
रौतहटसदरमुकाम गौर स्थित जिल्ला अदालतको सडकमा मिलन केन्द्र नजिकै २०६८ असार २३ गते राति साढे ८ बजेतिर अन्र्तराष्ट्रिय कुश्ती खेलाडी उपेन्द्र दास वैरागीको गोली हानी हत्या भएको थियो । वैरागीको हत्या आरोपमा रौतहट प्रहरीले एकजनालाई पक्राउ गरेको छ ।
प्रहरीले जिल्लाको साबिक प्रेमपुर गोनाहीगा.वि.स. वडा नं. ३ हाल देवाही गोनाही नगरपालिका वडा नं. ७ बस्ने सोनफी पासवान भन्ने सोनफी हजरालाई पक्राउ गरेको हो । प्रहरीले हजारालाई गौर नगरपालिका वडा नम्बर ५ सडक खण्डमा हिलडुल गरी रहेको अवस्थमा पक्राउ गरेको जिल्ला प्रहरी कार्यालय रौतहटले जनाएको छ ।घटना लगतै खेलाडी दासकी श्रीमतीरामकुमारी देवीले हजारा लगायत ५ जनाको नाममा जाहेरी दिएकी थिइन् ।
उनले जाहेरी दिएपश्चात हजारा फरार रहेका थिए । वैरागीका कान्छा छोरा प्रेम यादवले १० वर्षपछि भएपनि एकजना फरार आरोपी पक्राउ पर्नु राम्रो संंकेत भएपनि उनकै माध्यमद्धारा प्रहरी घटनाको मुख्य योजनकाकारसम्म पुग्नुपर्ने बताउँछन् ।देशको नाम उच्च पार्ने खेलाडीको सम्मानको लागि भएपनि राज्य सो हत्याको योजनाकारहरुलाई पक्राउ गर्न लागिपर्नु पर्ने उनको भनाइ छ ।
हत्या गरिएका बैरागी अन्तराष्ट्रिय कुश्ती खेलाडी समेत रहेका थिए । उनीत्यो बेलाका नेपालकै चर्चित कुश्ती खेलाडी थिए । नेपालमा सन १९९९ भएको आठौं साफ खेलकुद कुश्ती खेलमा कास्य पदक जितेका बैरागीलाई सरकारले गोरखा दक्षिणबाहुबाट सम्मान गरेको थियो ।
जिल्लाकै शानको रुपमा रहेका वैरागीको हत्या पछि गौरमा ठूलो जनप्रदर्शन भयो ।
जनप्रदर्शनको दवावमा नेपाल सरकारले उनलाई शहीद घोषणा गर्ने र परिवारलाई १० लाख क्षतिपूर्ति दिने भनेर प्रतिवद्धता जनायो । तर घटना घटेको १० वर्षपछि पनि न उनलाई शहीद घोषणा गरियो न त परिवारले क्षतिपूर्ति पाए ।
खेलाडीलाई देशको गहना भन्ने गरिन्छ । आफ्नो देशलाई खेलकै माध्यमद्धारा चिनाउन सफल खेलाडीको हत्या भएको १० वर्ष बितिसक्दा पनि उनले न्याय पाएका छैनन् । घर झगडामा मृत्यु भएकाहरुलाई पनि शहीद घोषणा गर्न पछि नपर्ने सरकार देशको नाम उच्च पार्ने खेलाडीलाई शहीद घोषणा गर्न ढिलाइ गर्न नहुने स्थानीयका माग छ ।
