चितवन। नारायणगढको लायन्स चोकमा निजी कम्पनीले दुई अर्ब लागतमा १२ तले व्यवसायिक भवन निर्माण गर्ने भएको छ। सार्वजनिक निजी साझेदारीअन्तर्गतको परियोजनाका लागि भरतपुर महानगरपालिका र आर्या बिल्डर्स एण्ड इञ्जिनियरिङ प्रालिबीच सम्झौता भएको छ।
पाँच तारे होटलसहितको बहुउद्देश्यीय प्लाजा निर्माणका लागि महानगरपालिकाले १० कट्ठा जग्गा ३० वर्षका लागि दिने सम्झौता गरेको हो। यस अवधिमा महानगरले राजस्वमा ८१ करोड रुपैयाँ प्राप्त गर्नेछ भने त्यसपछिको स्वामित्व महानगरको हुनेछ ।
महानगरप्रमुख रेनु दाहालले देशमा नै पहिलोपटक सार्वजनिक-निजी साझेदारी नमूनामा भरतपुरले महत्वपूर्ण काम गर्न सफल भएको बताइन। यो परियोजना जिल्लाको समग्र विकासमा एक कोसे ढुंगा हुने उनको भनाइ छ। सम्झौतामा तोकिएकै समयमै निर्माण सम्पन्न गर्न उनले आर्या बिल्डर्सलाई आग्रह गरिन्। उनले भनिन् ‘यो प्लाजाले नारायणगढलाई व्यवस्थित शहर बनाउन सहयोग पुग्ने छ।’
आर्या बिल्डर्स एन्ड इञ्जिनीयरिङका प्रबन्धक जीवन कँडेलका अनुसार भदौको पहिलो साताबाटै निर्माणको काम अगाडि बढाइने छ। महानगरसँग तीन वर्षभित्रमा काम सम्पन्न गर्ने गरी सम्झौता भएको छ। निर्धारित समयअघि नै परियोजना सम्पन्न गर्ने गरी काम अगाडि बढाउने उनको भनाइ छ।
बहुतले भरतपुर मेट्रो प्लाजा दुई तला अन्डर ग्राउन्ड पार्किङसहित १६ तलाको हुनेछ। प्लाजा तीन लाख २५ हजार वर्ग फिट र ५१ मिटर उचाइको रहने छ। दुई तला बेसमेन्ट पार्किङको सुविधा हुने भवनमा पाँच तारे होटलदेखि सिनेमा हल, फुट कोर्टका साथै व्यावसायिकस्थल हुने डिजाइन छ। आयोजनाको निर्माण आर्या बिल्डर्सले गर्नेछ भने यसको अनुगमन र नियमन महानगरपालिकाले गर्ने छ। रासस
