काठमाडौं । कांग्रेसका प्रवक्ता विश्वप्रकाश शर्माले भारतीय सुरक्षा बल एसएसबीले तुइन काटेर भएको घटनालाई अमानवीय र आपत्तिजनक भन्दै दुख व्यक्त गरेका छन् । शुक्रबार व्यास गाउँपालिकाबाट भारतको उत्तराखण्ड राज्यको पांगलहुंदै खलंगा आउँदै गर्दा तुइनबाट महाकाली नदी तर्ने क्रममा एसएसबीका जवानले तुइनकाटिदिएपछि ३५ वर्षका युवा जयसिंह धामी वेपत्ता भएका थिए ।
शनिबार शर्माले एक विज्ञप्ति जारी गर्दै नदी तर्ने क्रममा तुइन नदीमा खसेर बेपत्ता भएको घटना दुःखद मात्रै नभएर अमानवीय र आपत्तिजनक भएको बताएका छन् । त्यसैगरी यस घटनाबारेमा भारतीय पक्षसँग संवाद गर्न र आफ्ना नागरिकलाई न्याय दिलाउन नेपाली कांग्रेसको तर्फबाट सरकार समक्ष प्रवक्ता शर्माले माग गरेका छन् ।
‘घटनाको सम्पूर्ण वास्तविकता सार्वजनिक गर्न, भारतीय पक्षसँग यसबारेमा संवाद गर्न, आफ्नो नागरिकलाई न्याय दिलाउन, सम्बन्धित परिवारजनलाई राहत दिन र दिलाउन नेपाली कांग्रेस पार्टीका तर्फबाट म सरकार समक्ष माग गर्दछु । आफ्नो नागरिकको जीवन सुरक्षा गर्ने दायित्व बोकेको सरकारले यसलाई अत्यन्तै गम्भीरतापूर्वक लिएर आवश्यक गम्भीर पहलकदमी गर्ने विश्वास लिएको छु,’ विज्ञप्तिमा भनिएको छ ।
