काठमाडौं । निवर्तमान प्रधानमन्त्री केपी शर्मा ओलीको आशीर्वादमा नेपाल प्रहरीको अतिरिक्त प्रहरी महानिरीक्षक (एआईजी) सहकुलबहादुर थापाले कानून, न्याय तथा संसदीय व्यवस्थामन्त्री ज्ञानेन्द्रबहादुर कार्कीसँग भेट गरेर मानव स्रोत तथा प्रशासन विभाग मागेका छन् ।
केही दिन अगाडि मन्त्री कार्कीलाई एआईजी थापाले भेटेर आफूलाई अन्याय नगर्न आग्रह गर्दै प्रहरीको प्रशासन विभाग माग गरेको उच्च स्रोतले जनाएको छ । एआईजीलाई बोकेर नेपाली कांग्रेस काठमाडौंको सभापति सबुजकृष्ण बानियाँले लगेर गएका थिए । सभापति बानियाँ र थापा नातेदार पर्छन् ।
नेपाल कम्युनिस्ट पार्टी ( एमाले ) का समर्थक एआईजी थापालाई भावी प्रहरी महानिरीक्षक (आईजीपी ) बनाउन नातेदार भएकै कारण बानियाँले मन्त्री कार्कीलाई भेट गराउन लगेको आरोप छ ।एमाले समर्थक एआईजी थापालाई कांग्रेसले धेरै महन्व नदिएर सुरक्षा परिषदमा सरुवा गरेर केपी शर्मा ओलीलाई औकात देखाइदिनुपर्ने नेपाली कांग्रेसभित्र आवाज उठेको छ ।
एआईजी थापालाई अगाडि सारेर काठमाडौं नेपाली कांग्रेसका सभापति बानियाँले विगतमा नवराज सिलवाल काण्ड भए जस्तै अर्को थापा काण्ड गराउन खोजेको भनेर आलोचना भएको छ ।
एआईजी थापाले आकर्षक विभाग पाउन र भावी आईजीपीका लागि अहिले कांग्रेसका नेताहरूको ढोका दैनिक सरह चार्न थालेका छन् । एआईजी थापाले प्रधानमन्त्री शेरबहादुर देउवाकी पत्नी आरजु राणासँग भेट गर्न खोजी रहेका छन् ।
आरजुसँग सेटिङ मिलाएर प्रशासन विभागको जिम्मेवारी लिनुका साथै भावी आईजीपी बन्ने बाटो बनाउन खोजेको आरोप छ ।ओलीले प्रधानमन्त्री पद फुत्किनुभन्दा केही अगाडि थापालाई नायब प्रहरी महानिरीक्षक (डीआईजी)बाट एआईजीमा बढुवा गरिदिएका थिए ।थापालाई एआईजी बनाउन एमालेका नेता एवम् सांसद अपहरणको वात लागेका महेश बस्नेतको जोडबलमा ओलीसमक्ष जोडबल गरेको आरोप छ ।
