वीरगञ्ज । प्रहरीले अवैध हतियारसहित वीरगञ्जबाट तीन जनालाई पक्राउ गरेको छ । वीरगञ्ज महानगरपालिका–२५ सिर्सिया बस्ने २२ वर्षीय अनिल पटेल, २० वर्षीय रक्की पटेल र पोखरिया नगरपालिका–२ बस्ने २० वर्षीय विक्रान्त पटेललाई प्रहरीले आइतबार राति पक्राउ गरेको हो ।
वीरगञ्ज–१५ लक्ष्मणवा चोक नजिकै एक होटलमा सानो हतियार बेचबिखन गर्ने उद्देश्यले तीन जना बसिरहेको भन्ने सूचनाको आधारमा प्रदेश २ प्रहरी कार्यालयको सूचना संयन्त्र तथा जिल्ला प्रहरी कार्यालय पर्साको टोलीले उनीहरुलाई पक्राउ गरेको हो ।होटलमा खाजा खाएर बसिरहेका उनीहरुको शरीर खानतलासी लिँदा अनिलको साथबाट एक थान कटुवा पेस्तोल फेला परेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक ओमप्रकाश खनालले जानकारी दिए ।
उनीहरुको साथबाट पेस्तोल तथा प्रदेश २–०३–०१३ प २०९७ नम्बरको मोटरसाइकल र अन टेस्ट सुपर स्प्लेन्डर मोटरसाइकल बरामद गरिएको उनले बताए ।पक्राउ परेका तीनैजनालाई हिरासतमा राखेर हातहतियार सम्बन्धी कसूरमा अनुसन्धान भइरहेको प्रहरीले जनाएको छ ।
