काठमाडौं । केही दिनयता नेपालमा कोरोना भाइरस संक्रमितको संख्या फेरि बढेको छ । स्वास्थ्य तथा जनसंख्या मन्त्रालयका सहप्रवक्ता डा. समीरकुमार अधिकारीले पछिल्लो चार–पाँच दिनमा परीक्षण गराउन आउनेको संख्या बढेको बताए । ‘दैनिक पीसीआर परीक्षण गर्नेमध्ये पोजेटिभ पुष्टि हुने २५ प्रतिशत देखिन्छ । यो ठूलो संख्या हो,’ सहप्रवक्ता अधिकारीले भने ।
मन्त्रालयका अनुसार गएको हप्तासम्म सक्रिय संक्रमितको संख्या ५०० भन्दा बढी रहेका जिल्लाको संख्या ९ थियो । यो हप्ता नवलपरासी पूर्व, रुपन्देही र कैलालीमा सक्रिय संक्रमितको संख्या बढेर ५०० भन्दा माथि पुगेको छ ।शुक्रराज ट्रपिकल तथा सरुवा रोग अस्पतालका प्रमुख एवं सरुवा रोग विशेषज्ञ डा. अनुप बास्तोलाले पछिल्लो समय अस्पतालमा आउने बिरामीको चाप बढ्दै गएको बताएका छन् ।
निषेधाज्ञा खुकुलो हुँदै गएपछि एकसाता यता कोरोनाको लक्षण भएका बिरामीको संख्या बढेर गएको छ ।शुक्रराज ट्रपिकल तथा सरुवा रोग अस्पतालमा प्रत्येक दिन १५ देखि २० जना लक्षणसहितको कोरोना संक्रमित बिरामी इमर्जेन्सीमा आउने गरेको उनले बताए । जसमध्ये सातदेखि १० जना इमर्जेन्सीमा भर्ना हुने गरेको छ ।आईसीयूको २४ बेडमध्ये २१ जना उपचाररत छन् । कोभिड एचडीयूमा ४० मध्ये ३५ जना उपचाररत छन् । कोभिड स्पेशल आइसोलेसनमा ५ जना उपचाररत छन् ।
सरकारी मापदण्ड विपरीत लाइन्स क्लवको भेला आज शुक्रबारबाट हुदैछ। कोरना कहरको समयमा संक्रमण बढेको भन्दै सरकारले पच्चीस जना भन्दा बढी भेला तथा जमघट गर्न नपाउने व्यवस्था गरेको भए पनि लाइन्स क्लव अफ इन्टरनेशनल ३२५ ; बि ; एक को यो ठूलो भेला आयोजना गरिन लागेको हो ।उक्त क्लवको गभर्नरमा बिशेश्वर आचार्य रहेका छन् । काठमाडौको सोल्टी होटलमा शुक्रबार र शनिबारका लागि कार्यक्रम भनी बुक गरिएको र उक्त भेलामा झण्डै तीनसयको हाराहारीमा मानिसको भेला लागेको छ।
आवासिय उक्त भेलामा वेलफियर बैंक चलाउने नाममा प्रत्येक सहभागीबाट सत्र हजारको दरले रकम उठाइएको समेत थाहा भएको छ। सरकारी निर्णय विपरीत यति ठूलो भेला आयोजना गर्नको पछाडि स्थानीय प्रहरी प्रशासन र होटलको समेत मिलिभगत रहेको छ।
