संसद विघटनको मुद्दा : सभामुखका वकिलको बहस आज लगत्तै रिट निवेदकको जवाफी बहस

काठमाडौँ । संसद विघटनविरुद्धको मुद्दामा सभामुख अग्निप्रसाद सापकोटाका वकिलको बहस आज हुँदैछ । सभामुखका लागि २ घण्टाको समय छुट्याइएको छ । सभामुखको पक्षबाट वरिष्ठ अधिवक्ताहरु श्यामप्रसाद खरेल, लभकुमार मैनाली, उपेन्द्रकेशरी न्यौपानेका साथै अधिवक्ताहरू मेघराज पोखरेल र श्रीकृष्ण सुवेदीले बहस गर्ने भएका छन् ।

सभामुख पक्षको बहस सकिएपछि आजै रिट निवेदक पक्षका वकिलहरुको जवाफी बहस सुरु हुनेछ । उनीहरूका लागि पनि २ घण्टा समय छुट्याइएको छ । आजै यी दुवै पक्षका बहस सकिएमा भोलि एमिकस क्युरीले इजलासलाई आफ्नो राय दिने बताइएको छ ।सर्वोच्च अदालतको संवैधानिक इजलासमा यही असार ९ गतेदेखि निरन्तर सुनुवाइ जारी छ ।

गत जेठ ८ गते संसद विघटन गरेपछि रिट निवेदकहरुले राष्ट्रपतिको कार्यालय, प्रधानमन्त्री र सभामुखलाई विपक्षी बनाएका थिए । राष्ट्रपति र प्रधानमन्त्री पक्षका वकिलको बहस सकिएको छ । तर संसद् विघटन र प्रधानमन्त्री नियुक्तिका विषयमा सभामुखको फरक मत रहेकाले उहाँकाे पक्षबाट छुट्टै बहस हुने भएको हो ।यी सबै बहस र राय सुनिसकेपछि इजलासले उक्त मुद्दामाथि केही दिनभित्रै फैसला गर्ने बताइएकाे छ ।