काठमाडौं ।प्रहरी महानिरीक्षक शैलेश थापा क्षेत्रीले जिल्लाको समग्र शान्ति सुरक्षा कायम गर्न अन्तरजिल्ला सुरक्षा समन्वय कायम गरी नेतृत्वदायी भूमिका खेल्दै परिस्थिति अनुसार व्यावसायिक रुपमा तयार भएर काम गर्न निर्देशन दिएका छन्।
हालै सरुवा हुनुभएका प्रहरी उपरीक्षक र प्रहरी नायब उपरीक्षकहरूलाई प्रहरी प्रधान कार्यालयमा बिहीबार निर्देशन दिँदै प्रहरी महानिरीक्षक थापा क्षेत्रीले त्यस्तो निर्देशन दिएका हुन्। जिल्ला कमान्डरको आधारभूत भूमिका बहन गरी समग्र जिल्लामा सुरक्षाको अनुभूति गराउन पनि उनले निर्देशन दिए।
‘सौहार्दपूर्ण वातावरण बनाउन विशेष चनाखो भई परिचालित हुनुपर्ने आवश्यकता छ,’ क्षेत्रीले भने। क्षेत्रीले मनसुनजन्य विपद्, कोभिड-१९ को संक्रमणजस्तो विषम परिस्थितिमा विपद व्यवस्थापन तथा कोरोना संक्रमण रोकथाम र नियन्त्रणमा आ-आफ्नो तर्फबाट सक्रिय भई महत्त्वपूर्ण योगदान पुर्याउन पनि निर्देशन दिए।
आर्थिक अनियमितताविरूद्ध खरो रुपमा प्रस्तुत भई प्रहरी कर्मचारीको मनोबल उच्च राख्न प्रहरी नेतृत्वले व्यवहार, सुविधा, ड्युटी, बिदा र कार्यसम्पादन मूल्यांकन न्यायोचित रुपमा गर्नुपर्ने उनले बताए। क्षेत्रीले प्रहरी कर्मचारीहरूको आचरण र व्यवहार परिवर्तन गरी आम नागरिकको दैनिकीप्रति व्यावहारिक बन्न र सुख दु:ख बुझ्ने वातारण बनाउन कुशल व्यवहारका साथ प्रस्तुत हुनुपर्ने बताए ।
